Mildvêr og regn på måndag – gje vatnet plass
Det kan bli fare for flaum og ras neste veke, når det blir høgare temperaturar, regn og snøsmelting. Kommunen har lagt ut tips på heimesida om korleis ein ryddar plass til at smeltevatnet skal få fritt leide ut av bygdene.
Måndag 13. januar er det venta eit kraftig mildvêr frå Rogaland og nordover til Nordland, og NVE har sendt ut pressemelding som førebur oss på vidare farevarslar. Regn høgt til fjells og snøsmelting kan føra til flaum og skred fleire stader utover måndag, mellom anna over heile Vestlandet.
«Vêrvarselet og informasjonen kan endra seg i dagane fram mot måndag, men slik det ser ut no, vil me kunna få faregrad 4 for snøskred i mange regionar. Førebels ser det ut til at Vestland, Møre og Romsdal og Nordland er mest utsett for snøskred», står det å lesa i pressemeldinga frå NVE.
Annonse
Flaum-beredskap
Faregrad 4 er den nest høgaste faregraden for snøskred. Dette inneber at snøskred kan treffa infrastruktur på spesielt utsette stader, og at all ferdsle i skred-terreng er frårådd. Det kan også koma sørpe- og jordskred, og ein forventar auka vassføring og mogleg flaum på grunn av nedbør og mildvêr.
– Dette kan mellom anna føra til vanskeleg framkome på grunn av mykje overvatn, og isgangar i islagte elver, seier flaumvakt Torill Engen Skaugen.
Det er store sjansar for at det er mykje snø og is i kummar og avløp rundt omkring, som kan hindra vatnet å renna vekk.Kvinnherad kommune vil at folk skal førebu seg og eigedomane sine på mogleg flaum, og oppmodar publikum om å hjelpa til med å gje vatnet fritt leide. Denne lista med tips om tiltak er lagt ut på nettsida til kommunen:
Tips til flaum-beredskap
| Fjern snø og is som ligg over sluk og avløp, slik at vatnet blir leia vekk når mildvêret kjem |
| Ein kan salta i sluk og kummar for å få opp farten på systemet |
| Lag renner i isen/snøen som vatnet kan følgja bort frå gardsplassar og gater |
| Sørg for at smeltevatn ikkje blir liggjande inn mot grunnmuren. Då unngår du fuktskader, spesielt der det er ein kjelleretasje. |
| Sjekk takrenner og nedløpsrøyr slik at smeltevatnet kan leiast bort frå huset. |
| Måk av terrasse og eventuelle tak. Når mildvêret kjem blir snøen tung. |
