Middelhavsvind gjev uvanleg varme

Ifølgje Meteorologisk institutt har varme vindar med middelhavsluft frå Sør-Europa prega Vestlandet dei siste par dagane. Hjå dei offisielle målestasjonane er bestenoteringa 20,9 grader på Ørsta-Volda lufthamn torsdag føremiddag.

– Det er ikkje uvanleg at vi får eit mildt blaff i oktober. Det får vi kvart år. Men det er ganske uvanleg at det skjer om natta, seier statsmeteorolog Geir Ottar Fagerlid til NRK.

I natt vart det målt 18,2 grader i Bergen, medan det torsdag morgon vart registrert 18,6 grader i Etne, bygda som er ofte er blant dei varmaste i landet.

Men om vi ser på dei uoffisielle målestasjonane, så gjer Kvinnherad det sterkt. Spesielt det automatiske anlegget til Kvinnherad Elektro på Vang i Rosendal har nokre veldig interessante resultat. Klokka 11.00 på onsdag nådde det tosifra plussgrader, og etterpå steig temperaturen jamt og trutt. Klokka 19.00 viste stasjonen 20 grader. Det meste av natt til torsdag heldt det seg over 20, faktisk også over 21 i mange timar. Den høgaste noteringa skjedde klokka 04.00 med 21,2. Same resultat oppstod klokka 08.00.

På føremiddagen torsdag dalte temperaturen litt til å byrja med, men frå klokka 11.30 passerte stasjonen igjen 20 grader.

Ifølgje meldingane på Yr.no skal vêret bli dårlegare den neste veke, men det blir nokolunde varmt, med over 10 grader som maks kvar dag.