Meteren er tilbake – dette er dei nye nasjonale smitteverntiltaka

Regjeringa innfører nye nasjonale smitteverntiltak for å få ned belastninga på helse- og omsorgstenesta, og for å avgrensa spreiinga av omikron-varianten.

Det kunne statsminister Jonas Gahr Støre fortelja på tysdagens pressekonferanse.

– Vi skulle inderleg gjerne vore ferdige med pandemien. No er situasjonen likevel så alvorleg at vi må setja inn nye tiltak for å bevara kontrollen. Difor bli det ei annleis julehøgtid også i år. Faren for ein overbelasta helseteneste og spreiinga av det meir smittsame omikron-viruset gjer det nødvendig med nye, strenge tiltak for å redusera sosial kontakt i samfunnet, seier statsminister Jonas Gahr Støre.

Målet til regjeringa er den same som for éi veke sidan; å unngå overfylte sjukehus og ei overbelasta helseteneste. For å klara det lyttar dei til helsemyndigheitene, og innfører nye, nasjonale grep som vil gripa inn i kvardagen til kvar enkelt av oss.

Meteren, som vi alle har blitt så kjent med det siste halvanna året, er no henta tilbake. Det same er reglar for skjenkestopp og ei oppmoding om å avgrensa talet nærkontaktar.

– Men det aller viktigaste; ta vaksinen! Anten det er dose ein, to eller tre, ta den. Den har betydning for bekjempinga av viruset, seier statsminister Støre.

Dette er dei nasjonale tiltaka som trer i kraft natt til torsdag, og som varer i fire veker.

Råd og anbefalingar:

Avstand og sosial kontakt

* Alle bør halda 1 meters avstand til andre enn husstandsmedlemer og tilsvarande nære.

* Anbefalinga gjeld ikkje barn i barnehagar og barneskular. Det er også unntak for vaksne som jobbar med tenester for barn og unge, og sårbare grupper.

* Ein bør ikkje ha fleire enn 10 gjester heime utover eigen husstand. Ein kan ha inntil 20 gjester éin gong i løpet av jule- og nyttårshøgtida, men det bør vera ein meters avstand mellom alle gjestene. Alle må tenka gjennom kor mange nærkontaktar ein har samla sett.

* Barn i barnehagar og barneskular kan ha besøk frå eigen kohort sjølv om det overstig anbefalt tal gjester.

* Reduser talet nærkontaktar, men ikkje isoler deg.

* Treff andre utandørs når det er mogleg.

Organiserte fritidsaktivitetar

* Fritidsaktivitetar bør gjennomførast utandørs så langt det er mogleg, og garderobar bør haldast stengt.

* Ved organiserte fritidsaktivitetar innandørs vert det anbefalt at vaksne over 20 år er i grupper på inntil 20 personar. Vidare anbefalast det at vaksne innandørs held avstand der det er mogleg for å utøva aktiviteten, og at ein bør halda 2 meters avstand ved høgintensiv trening.

* Det vert ikkje gitt konkrete anbefalingar om avstand og tal når barn og unge under 20 år trener og deltar på idretts- og kulturarrangement.

* Toppidrett kan gjennomførast som normalt.

SFO, skular og barnehagar

* Jamleg testing i skular med høgt smittetrykk.

* Kommunane skal ved behov igjen ta i bruk trafikklysmodellen i skular og barnehagar. Utgangspunktet er grønt nivå, med mindre noko anna vert vedteke lokalt.

* Det kan arrangerast samankomstar for barn i barnehage eller barneskule med heile kohortar med nødvendig tal vaksne til stades.

* Universitetet, høgskular og fagskular bør så raskt som praktisk mogleg innføra undervising i mindre grupper og meir digital undervising. Studentar som er avhengige av å gjennomføra forsøk i laboratorium eller ferdigheitstesting, bør prioriterast for fysisk undervising.

* Universitet, høgskular og fagskular bør legga til rette for eksamen og obligatoriske kurs, anten digitalt eller fysisk der det er praktisk mogleg med godt smittevern. Det same gjeld for andre utdanningsinstitusjonar.

Arbeidsliv

* Anbefaling om 1 meters avstand og auka bruk av heimekontor.

* Anbefaling om munnbind om det ikkje er mogleg å halda avstand, med mindre det er tatt i bruk fysiske barrierar som bruk av skiljeveggar eller liknande.

* Heimekontor og munnbind gjeld ikkje for tenester der dette er til hinder for at tilsette kan utføra nødvendige og lovpålagte oppgåver i møte med sårbare grupper og barn og unge.

Lufting

* Det anbefalast god ventilasjon i situasjonar der ein oppheld seg i same rom over tid med personar som ikkje er husstandsmedlem og tilsvarande nære.

Forskriftsfesta tiltak:

Arrangement og samankomstar:

* Maksimalt 20 personar på privat samankomst på offentleg stad, i lånte eller i leigde lokalar.

* Minnestunder eller gravferder vert rekna som eit offentleg arrangement med faste tilviste sitteplassar.

* 3 x kohortar av 200 personar med to meters avstand mellom kohortane heile tida på offentlege arrangement med faste tilviste sitteplassar.

* Maksimalt 50 personar på offentlege arrangement utan faste tilviste sitteplassar.

* Ved innandørs arrangement skal det utpeikast ein arrangør som skal ha oversikt over kven som er til stades og gjennomføringa skal vera smittevernfagleg forsvarleg.

* Skjenkestopp klokka 24.00 på alle arrangement med skjenkeløyve.

* Arrangøren skal sørga for at alle som er til stades ved innandørs arrangement skal kunna halda minst 1 meters avstand til andre som ikkje er i same husstand eller er tilsvarande nære. Det vert gjort unntak for fleire grupper, bl. a. for utøvarar på kultur- og idrettsarrangement, deltakar på enkelte kurs og dei som er i same kohort i barnehage eller barneskule.

* På arrangement kor alle i publikum sitter på faste tilviste plassar er det tilstrekkeleg avstand dersom arrangøren legg til rette for at publikum har minst eitt ledig sete mellom seg på same seterad frå dei kjem til arrangementet. Personar frå same husstand kan setja seg nærmare kvarandre etter ankomst.

Serveringsstadar

* Påbod om at serveringsstaden skal sørga for at alle kan halda 1 meters avstand til andre enn husstandsmedlem og tilsvarande nære. Det skal vera minst 1 meters avstand mellom sitteplassane ved gjestane sin ankomst, likevel slik at personar i same husstand eller tilsvarande nære kan setja seg nærmare kvarandre.

* Serveringsstadar med serveringsløyve skal ha sitteplassar til alle gjester, men det er ikkje eit krav ved kulturarrangement på serveringsstaden.

* Alkohol kan berre serverast ved borda.

* Skjenkestopp klokka 24.00.

* Serveringsstaden skal registrera kontaktopplysingar til gjester som samtykker til det.

Smittevernfagleg forsvarleg drift

* Påbod om smittevernfagleg forsvarleg drift for barnehagar, skular og annan opplærings- og utdanningsverksemd. Kommunane skal igjen ta i bruk trafikklysmodellen. Tiltaksnivået er grønt med mindre det vert vedteke noko anna lokalt. Det kan bli aktuelt å igjen setja alle barnehagar og skular på landet på gult nivå.

* Følgande verksemder skal drivast smittevernfagleg forsvarleg for å kunna halda ope.; bibliotek, fornøyelsesparkar, symjehallar, badeland, spaanlegg, hotellbasseng, treningssenter, bingohallar, spelehalar, kjøpesenter, butikkar, varemesser, midlertidige marknadar og liknande.

* Dette inneber krav om å syta for at det mogleg å halda minst 1 meters avstand til personar som ikkje er i same husstand eller tilsvarande nære, og at verksemder har utarbeida rutinar for god hygiene, godt reinhald og lufting.

* Med unntak av bibliotek, butikkar og kjøpesenter, skal verksemdene registrera kontaktopplysingar til dei gjestene som samtykker til det.

Munnbind

* Påbod om bruk av munnbind når det ikkje er mogleg å halda ein meter avstand i butikkar, kjøpesenter, serveringsstadar, kollektivtransport, taxi. Påbodet gjeld også for tilsette med mindre det er tatt i bruk fysiske barrierar.

* Munnbindpåbod gjeld også hos frisører, hudpleiarar og andre ein-til-ein verksemder.

Heimekontor

* Påbod om at arbeidsgjevar skal leggja til rette for heimekontor det er det mogleg utan at det går utover tenester som krevjar at det å vera til stades er viktig og nødvendig for verksemda, som for eksempel for å ivareta barn og sårbare grupper.

Karantene

* Karanteneplikt for nærkontaktar med ein stadfesta smitta kor det er mistanke om omikron, utvida til også å gjelda øvrige nærkontaktar, ikkje berre husstandsmedlem og tilsvarande nære.