– Merkedag lik opninga av Folgefonntunnelen og Halsnøytunnelen
Ordførar Vegard Bjørnevik meinte opninga av Krokaparsellen går inn i historia som ein av dei viktigaste dagane i Kvinnherad-soga.
Publisert
Sist oppdatert
– Dette er eit av dei største løfta på standard for oss gjennom åra. 20. september 2024 er ein dag for historiebøkene, på lik linje med opninga av Folgefonntunnelen 15. juni 2001 og Halsnøytunnelen 8. mars 2008.
Det sa ordførar Vegard Bjørnevik då Krokatunellen skulle offisielt opnast fredag formiddag. Han nytta høvet og gratulerte lokalsamfunn, brukarar og kommunen med dagen, og sytte for ærast alle som ærast kan for dette prosjektet.
Annonse
Auka trafikk
– Det er viktig i regional samanheng å knyta oss tettare til regionen i denne retning. Dette prosjektet vil gje Folgefonntunnelen sjansen til å slå ut i full blom. Eg har fått tilbakemelding på at Årsnes-Gjermundshamn har auka trafikken monaleg etter tunnelen opna, la Bjørnevik til.
Han var ikkje i tvil om at tiltaket er viktig for næringslivet på begge sider av Folgefonntunnelen, og oppmoda alle om å bruk vegen med vit, før han sikta seg inn på representantane frå fylkesting og fylkeskommune.
– De er hjarteleg velkomne tilbake, me har endå meir veg å visa dykk enn dette, smilte han.
Annonse
– Mas frå sjåførar
Avdelingsdirektør for infrastruktur og veg i Vestland fylkeskommune Dina Lefdal trekte i sin innleiingstale opp linjene tilbake til før anleggstarten i 2021.
– Krokaparsellen var ein samhandlingskontrakt med målpris, noko som var ein ny type kontrakt for oss, så har det vore utfordringar på begge sider, men me kom i mål, slo ho fast.
– Trafikken, med blant anna bussar og skuleskyss, skulle gå parallelt med arbeidet, og det førte til nattestengt veg for å sikra tryggleiken undervegs, både for dei vegfarande og dei som skulle arbeida med prosjektet, sa Lefdal vidare.
Mykje arbeid med tunellen gav tilsvarande mykje stein.
– Me har fått 11 kilometer med gul midtstripe no som ein konsekvens av dese steinmassane. Det er god og samfunnsnyttig bruk av overskotsmassane, meinte avdelingsdirektøren.
Annonse
Ho vedgjekk at det var litt mas for å få ta i bruk tunnelen, som tilsynelatande var ferdig lenge før han opna for trafikk.
– Me skjønar godt at sjåførane er utolmodige, men tunellar må vera tryggleiksgodkjente før me kan opna dei. Me var letta over at me kunne setja på trafikk på Krokatunellen før ferien, sa ho oppriktig før ho gratulerte alle med ny tunell og tilstøytande veganlegg.
Framkome og tryggleik
Fylkesvaraordførar Stian Davies fekk æra av å skjera over snora og markera Krokatunellen som offisielt opna.
– Det er ei stor glede å få stå her i dag og markera Krokatunellen og -parsellen. Både framkome og tryggleik er betra med dette prosjektet. Dette er livsviktig rassikring, og det har vore avgjerande for at dette prosjektet blei realisert. Ein legg til rette for tryggare kvardagar for dei som bur her og dei som bruker vegen. All ventinga under bygginga er verdt det, når me ser kva me får her, slutta Davies før han kunne skjera over snora.
Første- og andreklassingane frå Malmanger skule stod for dei kunstariske innslaga under opninga. Etter snora var kutta vanka det kaffi og kaker til alle dei frammøtte.
