Merkedag for genbanken

Tysdag 16. juni vert ein merkedag i redningsarbeidet for lakse- og sjøaurestammane frå vassdraga kring Hardangerfjorden.

Det opplyser Sven-Helge Pedersen, regional koordinator i Genbank Hardangerfjord.

– Då flyttar vi årets nyklekka yngel av laks og sjøaure frå anlegget i Sima til eit nytt flott genbankanlegg på Ims i Rogaland. Dette anlegget er bygd for å husa genmateriale frå dei 22 bestandane som er omfatta av innsamlinga. Genbank Hardangerfjord er det mest omfattande tiltaket myndigheitene har sett i verk innan ein region, og forvaltninga sitt mål med tiltaket er å ta vare på det unike genmaterialet kvar einskild bestand representerer i ein genbank, informerer Pedersen.

Føremålet med genbanken er ikkje minst å kunna reetablera dei ulike bestandane når negative påverknader er tilstrekkeleg reduserte.

I Kvinnherad er ei rekke vassdrag med bestandar av laks og sjøaure med i Genbank Hardangerfjord.  Dette gjeld vassdraga i Mauranger, Bondhuselva, Æneselva, Mels- og Hattebergselva, Guddalselva, Omvikdalselva og Uskedalselva.