Merkedag for Ænes Inkubator - og om to veker kjem første rogna

– Me legg ned grunnsteinen her ved vassinntaket, for elva og vatnet representerer den viktigaste ressursen me har her, sa dagleg leiar Jan Gunnar Strand ved Ænes Inkubator då han opna seansen i øvste enden av anlegget.

Grunnsteinen denne dagen var i realiteten ein tidskapsen, eit skrin fylt med blant anna dagsferske aviser, myntar, bøker og ein minnepinne med ulik informasjon om oppdrettsnæringa.

– Når dette skrinet blir opna om kanskje nokre hundre år, så vil det vera eit tidsvitne om vår tid, sa Strand til folkemengda som var møtt fram.

Ringverknader

Til stades var representantar for dei tre eigarane, oppdrettsbedriftene Eide Fjordbruk, Linga Laks og Tomre Fiskeanlegg, men også dei tilsette ved Ænes Inkubator og dei mange som er i sving med å byggja ferdig klekkeriet. I alt var det 70-80 til stades.

Ordførar Hilde Enstad og tidlegare ordførar Hans Inge Myrvold var tildelt æra med å leggja ned grunnsteinen. Enstad meinte i ein tale til dei frammøtte at det var fantastisk for Kvinnherad kommune at Ænes vart valt som stad for å byggja inkubatoren.

– Det er stort for ein kommune at noko med så store ringverknader som Ænes Inkubator kjem hit. Dette er med på å byggja Kvinnherad-samfunnet, meinte Enes.

Hans Inge Myrvold har også følgt Ænes Inkubator lenge.

– Det er eit prosjektet med store dimensjonar og kvalitetar. Det er innovasjon og berekraft i det som blir ein av dei viktigaste næringane i distrikts-Norge i framtida. Alle som er her deltar i å satsa på berekraftig framtid, og for å få norsk laks inn i framtida, sa Myrvold i sin tale.

Grunnsteinen vart ikkje berre lagt høgtidleg ned, men han vart også støypt grundig på plass med eit godt lass betong. Merkedagen vart også høgtida med meir godord, og kake og brus til alle og ein kvar. Men tid til å sleppa seg nedpå hadde ikkje nokon av dei som vart servert med kake. Allereie om to veker kjem dei første egga til klekkeriet, og produksjonen kan byrja.