Mellom 12 og 15 lokasjonar er skada: – Det framstår som planlagt

Etterforskinga er no i politiet sine hender, og det omfattande arbeidet med å stabilisera kundenettet er i full gong.

– Vi har no fått eit overblikk, og har noko lunde klarheit i omfanget, iallfall det mest kritiske. No er vi i full gong med feilretting, fleire folk har kome frå ferie og stilt opp på kortaste varsel, det er veldig flott, seier Gunnhild Nilsen Hillestad, dagleg leiar i Kvinnherad Breiband, til Grenda.

Kvinnherad Breiband er utsett for sabotasje. Estimert rettetid: ukjent

Stort behov for montørar

Arbeidet med å få orden på skadane er tidkrevjande, og Kvinnherad Breiband treng alle montørar dei kan få hand om.

– Både Haugaland kraft og BKK har rekt ut ei hjelpande hand, det set vi stor pris på, held ho fram.

Kablane som er klipt opp må nemleg skøytast manuelt. Sjølv om dei er vane med å gjera slike jobbar blir omfanget i dette høvet omtala som ekstraordinært.

– Til vanleg brukar vi å gjere slike operasjonar på natta, slik at kundane våre skal merke minst mogleg til det. Men no skjer alt på dagtid, noko som gjer at kundane merkar det godt. Vi kjem til å ha folk ute til det er på plass att, men vi må også ta omsyn til HMS, og montørane våre skal også kvila. Seinare i dag vil vi setja ein fot i bakken og vurdera om vi skal leiga inn ekstern hjelp, opplyser ho.

– Nærliggande å undersøka om dei ulike skadeverka kan ha noko samanheng

Feilmeldingar frå kl 20

Det er om lag 400 kundar som framleis står utan tenester etter at dei første feilmeldingane byrja å dukka opp rundt klokka 20.00 måndag kveld.

– Frå klokka 20 var det fleire og fleire lokasjonar som datt ut, og frå klokka 22 og utover vart det gjort mykje kartlegging. Det var tydeleg at det var noko ekstraordinært som hendte, for det forsvann så brått. Det såg ut som kablane vart klipt, og då vi gjennomførte ei utrykking såg vi at det var dette som hadde hendt, forklarar Hillestad.

– Det var ganske vilt! legg ho til.

– Telefonen har kokt

Etter ein hektisk dag har dei hatt mykje å henga fingrane i. Det har difor blitt mindre tid til å svara på telefonar og spørsmål frå kundane om kundenettet.

– Det har kokt på telefonen i dag, men vi har diverre ikkje hatt kapasitet til å svara alle. Men kundane våre har altså vore veldig tolmodige. Noko slikt som dette har jo aldri hendt før, så folk og politiet skal ha all skryt i denne samanhengen, rosar ho.

Den daglege leiaren i Kvinnherad Breiband rosar i same slengen lokalavisene for å hjelpa å dela nyttig informasjon om stoda.

– Det er gjort fysisk skade på utstyret vårt fleire stader i Kvinnherad

Framstår som planlagt

Lokasjonane Kvinnherad Breiband kjenner til som er klipt opp er fordelt på Sunde, Husnes, Uskedalen, Omvikdalen og i Dimmelsvik. Det er fleire lokasjonar i kvar bygd, og fleire av dei er også plassert i same område som BKK har sine lokasjonar.

Totalt har Kvinnherad Breiband opp mot 30 lokasjonar, og at halvparten av desse er sett ut av spel er såleis svært uvanleg og alvorleg.

Berre med kabelen som er øydelagt i Korsneset i Uskedalen er 150 kundar råka.

– Verkar det som at vedkomande som har gjort dette skadeverket har visst kva den gjorde?

– Det er kundekablane som er klipt, og det ser ut som det er gjort eit forsøk på å kutta sambandet. Fleire skap er brotne opp og det er eit omfattande arbeid som er gjort. Det er rett og slett gjort eit stort stykke arbeid. Dette må vera planlagt, slår Hillestad oppgitt fast.