Melder om svært mykje regn – sender ut fleire farevarsel
Frå natt til torsdag skal det regna uvanleg mykje i Kvinnherad. Det er i denne samanheng sendt ut tre forskjellige farevarsel på oransje nivå. I Kvinnherad kan det koma så mykje som 160 millimeter på eitt døger!
Publisert
Sist oppdatert
Tysdag sendte både NVE (Noregs vassdrags- og energidirektorat) og Meteorologisk institutt ut varsel om fare for regn, flaum og jord- og flaumskred på oransje nivå for store deler av Vestland, gjeldande frå natt til torsdag 31. oktober til fredag 1. november.
Statsforvaltaren i Vestland ved assisterande fylkesberedskapssjef Mari Severinsen har sendt informasjon om dette til alle kommunane, alarmsentralane og fylkesberedskapsrådet, samt i pressemelding til media. Varslinga gjeld:
Annonse
* Fare for svært mykje regn i midtre og indre strøk av Vestlandet.
* Jord- og flaumskredfare.
* Flaumfare.
«Dei delane av fylket som ikkje er råka av dei oransje varsla, er i dei fleste tilfella råka av gule varsel. Vi ber om at kommunane rapporterer til Statsforvaltaren om situasjonar som måtte oppstå og om tiltak som vert sett i verk», skriv Severinsen.
Annonse
Omfattande skader
NVE slår fast at oransje farevarsel skal takast på alvor.
«Oransje farenivå er ein alvorleg situasjon og kan føra til skader på vegar og bygningar», opplyser dei i ei pressemelding.
NVE utdjupar at oransje farenivå kan føra til fleire og alvorlege flaum eller skredhendingar, med omfattande skader. Dette kan få konsekvensar for både menneske, bygningar og viktig infrastruktur, som vegar, bruer og toglinjer. Vegar og jernbanar kan bli stengde, og dersom dei blir råka av flaum eller skred kan det ta lang tid før dei opnar igjen.
– Temperaturstigning og sterk vind i fjellet vil bidra til snøsmelting. Dette vil auka faren for jordskred i varslingsområdet. Vi tilrår folk å halda seg unna bratte skråningar, samt bekkar og elveløp med stor vassføring, opplyser Ronny Løland, jordskredvakt i NVE, i pressemeldinga.
Faren for jord- og flaumskred skal minka frå fredag morgon.
Annonse
Kvinnherad
I Kvinnherad er det torsdag meldt om inntil heile 160 millimeter regn i Mauranger. Deretter kjem Åkra med 117 millimeter og Rosendal med 116. På Varaldsøy ventar ein opp mot 114 millimeter, Omvikdalen 110, Hatlestrand 104, Matre 101, Uskedalen 95, Ølve 79, Utåker 78, Husnes 63, Halsnøy 56 og Fjelberg 47.
