Meir enn éin million avspelingar på Spotify - no er han klar for Festidalen
Endå eit stort namn klart til Festidalen 2025.
Bookingansvarleg i Festidalen, Daidalos Dahle, har fått sikra seg den nokså lokale køntriartisten Tobias Sten til lineupen. Sten, som kjem frå Stord, har for alvor hatt sitt store gjennombrot i den norske musikkbransen i år.
– Tobias er den nye vinen i nasjonal køntri. Han legg seg tett opp til pop-en og singer/songwriter-kulturen, seier Dahle.
Annonse
Skal ein tru pressemeldinga er artisten absolutt noko å sjå fram til.
«Gitaren er hans kompanjong og hatten er hans flagg. Stemma er hans våpen, og magasinet er spekka med kjensler» står det mellom anna å lesa om den flunkande ferske køntriartisten.
Over 1 million
20-åringen har i ung alder nådd langt, og har raskt utvikla seg til å bli eit av landet sine største talent innanfor sjangeren han driv med. Med meir enn éin million avspelingar på den mest kjente låta si «Heim te ståvo» på Spotify, er sjansen stor for at du kjenner igjen musikken hans.
Annonse
Gjennom songane hans får lyttarane også eit innblikk i ein utfordrande oppvekst.
«Han snur svik til styrke, og motstand til kjærleik. Ein utfordrande oppvekst vert omsett til ei lovande framtid», står det mellom anna i pressemeldinga, og vidare at det er ekstra stas at fenomenet kjem berre eit drygt lassokast frå Kvinnherad.
