Meiner prosjektet er altfor dyrt – vil heller drøfta ny ferjekai
Fylkesdirektøren meiner det blir særs krevjande å finansiera Sunnfast. Han vil i staden ta opp igjen diskusjonen om innkorting av ferjesambandet mellom Kvinnherad og Stord.
Publisert
Sist oppdatert
Fylkesdirektøren har skrive eit notat om Sunnfast til fylket sitt hovudutval for samferdsel og mobilitet. Utvalet skal ha møte no på onsdag, der saka kjem opp til diskusjon. Innhaldet i notatet må seiast å vera eit alvorleg skot for baugen for Kvinnherad og dei andre kommunane som har vedteke å jobba for prosjektet.
Fylkesdirektøren har gjort ei førebels vurdering av finansieringsløysinga for Sunnfast, basert på anslag for ferjeavløysingsmidlane og ei vurdering av bompengepotensialet. Det vert imidlertid presisert at anslaga for både kostnader og finansiering er usikre.
Annonse
«Ikkje minst vil det vere stor uvisse knytt til flytebru over Husnesfjorden. Prosjektet vil også kunne berøre verneområde, og har store utfordringar knytt til natur- og miljøverdiar. Det vil bli særs krevjande å finna fullfinansiering for Sunnfast-prosjektet. Sjølv med delvis bompengefinansiering, ferjeavløysingsmidlar og mva-refusjon ligg prosjektet an til å mangla om lag 9 milliardar 2021-kroner frå å vere fullfinansiert», heiter det.
Miljøomsyn
Fylkesdirektøren viser elles til arbeidet med konseptvalutgreiing for eit samband mellom E134 og Bergensområdet.
«Det vil vere naturleg å vurdere Sunnfast, saman med ei løysing mellom Kvinnherad og E134, som eit av fleire alternativ i dette arbeidet. Dette vil i så fall vere eit riksvegsamband. Grunna høge kostnader og eit stort finansieringsgap, ser fylkesdirektøren det som urealistisk å gå vidare med Sunnfast som eit fylkesvegprosjekt», konkluderer han.
Annonse
Fylkesdirektøren trekkjer også fram dei miljømessige konsekvensane av prosjektet. Det eine traséalternativet går i land nord for Brandvikneset på Huglo.
«På Miljødirektoratet sine heimesider står det følgjande om Brandvik landskapsvernområde med plantelivsfreding: «Området blei verna for å ta vare på den største kjende barlindbestanden i Noreg og ein fin bestand av kristtorn, i eit naturmiljø med rik og variert flora. Det har også ein stor vitskapeleg og pedagogisk verdi», vert det opplyst i notatet.
Det vert vidare minna om at sjøområda i Husnesfjorden er føreslegne verna som eit maritimt verneområde.
«Då vil tunge, tekniske inngrep som påverkar havbotnen normalt vere forbode. Dersom sjøområda blir verna vil dette vere ei problemstilling for Sunnfast-prosjektet, uavhengig av traséval», står det.
Ferjesambandet
Til slutt i notatet vert det vist til at dåverande Hordaland fylkeskommune og kommunane Stord, Kvinnherad og Tysnes i 2018 fekk utarbeida eit utkast til kommunedelplan for innkorting av ferjesambandet mellom Stord og Kvinnherad. Bakgrunnen er at ferjesambandet Skjersholmane-Ranavik har lang overfartstid, og det er eit potensiale for innkorting av sambandet. Men planen vart ikkje godkjent av kommunestyret på Stord.
Annonse
«Fylkeskommunen vart etter dette einige med dei tre kommunane om at dei fekk utgreidd Sunnfast, og at ein etter dette igjen skulle vurdere om det er grunnlag for å starte opp igjen arbeidet med å vurdere innkorting av ferjesambandet. Fylkesdirektøren ønskjer på dette grunnlag å drøfte med dei tre kommunane om det er grunnlag for å starte opp igjen arbeidet med innkorting av ferjesambandet Skjersholmane-Ranavik», heiter det.
