Meiner Ølve alderspensjonat må utvidast
Pensjonistforbundet HVØ ber kommunen om å snarast starta eit forprosjekt for å utvida Ølve alderspensjonat.
Publisert
Pensjonistforbundet HVØ har skrive brev til Eldrerådet i Kvinnherad kommune. Der står det at Ølve alderspensjonat sidan kring 1990 har hatt 16 omsorgsbustader med heildøgns tenester til utleige. Dette er tilrettelagde bustader for personar som betalar leige og treng eit heildøgnstilbod. Personalet er tilgjengeleg og kan tilkallast på kort varsel heile døgnet.
Rådet opplyser vidare at det fleste bebuarane kjem frå Ølve, Hatlestrand og Varaldsøy.
Annonse
I nærleiken
«Grunna dei demografiske endringane er det for få plasser på alderspensjonatet i Ølve i dag og i framtida. Fram til 2030 skjer det ei gradvis endring av behovet for tenester. Basert på dagens dekningsgrad, vil vi ha behov for å kunne gje tilbod til om lag 10 personar meir i omsorgsbustad. Vi må ha ei løysing for desse innan 2-5 år», heiter det i brevet som Vidar Ask har skrive under.
Det vert også påpeika at det om cirka 10 år er 250 personar over 80 år i bygdene Ølve, Hatlestrand og Varaldsøy.
«Helsedirektoratet opererer med at 10 % av dei over 70 år har til ei kvar tid behov for omsorgsbustad. Det tilsvarar hos oss eit framtidig behov på 25 plasser. Eldre i desse tre bygdene vil i mindre grad ha høve til å selje bustaden sin og kjøpe seg nytt sentrumsnært husvære. Dei kan derfor ha behov for å leige bustad. Dei vil då helst bu i nærleiken av der dei har budd før», står det i brevet.
Annonse
Kritisk punkt
Pensjonistforbundet meiner difor det trengs fleire omsorgsbustader i Ølve. Men sidan det normalt tek lang tid frå vedtak til ferdig utbygd omsorgssenter, meiner dei eit forprosjekt for ti nye omsorgsbustader ved Ølve alderspensjonat må starta no. Det vert også vist til at det i dag er venteliste for å få plass i omsorgsbustadane.
«År 2030 verkar å vere eit kritisk punkt for kva tid nye plasser bør stå klare. Ølve Bustadstifting, som var med på bygginga i Ølve frå starten av, er kjende med behovet. Dei ynskje å samarbeida med kommunen», skriv Vidar Ask.
Pensjonistforbundet HVØ ber om at saka vert teke opp i Eldrerådet sitt møte 21. januar.
