Mehl skal sykla med flagget på brystet i VM
Vidar Mehl frå Omvikdalen er ein av fire mannlege syklistar som er tatt ut til VM i e-sport som går av stabelen i februar. Før det skal han til Spania og få ein smakebit på profftilværet.
Publisert
Sist oppdatert
Norges Cykleforbund tok denne veka ut landslagstroppen på fire menn som skal sykla med flagget på brystet under VM i e-sport 26. februar neste år. Blant dei finn vi regjerande norgescupmeister og Movistar-ryttar Vidar Mehl.
– Det er veldig stas. Det var stort å få sykla med flagget på brystet i førre VM, så eg gler meg veldig til å få sjansen igjen, seier Vidar Mehl.
Annonse
Vekt og form
Førre VM vart den allsidige syklisten frå Omvikdalen nummer 12, i 2022 er målet å gjera det betre. For å få det til krevst det hardt arbeid.
– Eg skal prøva å trena bra gjennom vinteren, og så må eg halda meg frisk. Så handlar det sjølvsagt om å spissa formen maks inn mot den datoen når vi kjem til VM. Då både med tanke på vekt og fysisk form, seier han og legg til:
– For det er ikkje berre å setja seg ned på sykkelen å trø. Det er eit 30 sider langt regelverk vi må følgja, der i blant skal vi vegast før konkurranse. For personen din i spelet vert laga utifrå kva vekt du har. Eg, som då er tyngre enn dei minste, tar då meir luft og er tyngre i bakkane enn lettvektarane. Samtidig så går det fortare med meg nedover. På den måten vert det så nært verkelegheita som ein kan koma.
Annonse
Utnyttar seigleiken
VM-løypa er heilt annleis enn i fjor, og er ikkje akkurat skreddarsydd for Vidar. Men han satsar på at seigleiken hans kan føra han oppover på resultatlistene.
– Løypa avsluttar med ein fem minuttar lang bakke, og det er verkeleg ikkje laga for meg. Men eg har eit håp om at eg kan tyna vekta mi såpass mykje og vera i så god form at eg kan slå godt frå meg. Eg har kanskje ikkje den høgaste farten i meg, men eg er ganske seig, og kan forhåpentlegvis ta igjen ein del på slutten av løpet, seier Mehl.
Sjølve målsetninga for landslaget er endå ikkje staka ut, men Norge stiller med ein så slagkraftig tropp at Mehl meiner dei bør vera skuffa om dei ikkje har eit par ryttarar oppe i topp ti.
– Vi har eit lag som bør kunna kjempa heilt i toppen. Nålauga for å vinna er ganske lite, sidan feltet er fylt av verdsklasseryttarar. Men klarar ein å koma blant dei ti beste, så vil det i alle fall vera stort for min eigen del. Eg vart nummer tolv i fjor, så det hadde vore kjekt å gjera det betre, seier han.
Ein smakebit på profflivet
Annonse
Verdsmeisterskapet i februar er ikkje det einaste syklisten kan sjå fram til over nyåret. I midten av januar er han nemleg invitert til Spania for å vera med på teampresentasjonen til Movistar. Då saman med alle dei kjende profesjonelle landevegssyklistane til det som er eit av verdas største sykkellag.
– Det vert ei oppleving eg verkeleg ser fram til. Det skal bli kult å møta alle dei profesjonelle utøvarane deira, bu saman med dei og få bruka dei fasilitetane dei har til dagleg. For meg som syklar ved sida av jobb, så vert det spennande å sjå korleis dei skikkelege proffane lever. Det er nok eit gigantisk apparat rundt dei, der alt vert gjort klart for dei. Så det kan jo vera eg vert bortskjemt, ler Vidar.
Bortskjemt eller ei, så vert samlinga i Spania ein stor motivasjonspakke for Vidar fram mot VM.
– I tillegg til at det vert ei stor oppleving å få vera med på det, så vert det òg ein del av det å koma i form før VM. I tillegg er det veldig motiverande. Du får ein ny giv av å gjera ting du ikkje gjer til vanleg, det vert motiverande før sjølve hendinga og så får du ein giv av det etterpå. Klarer eg å dra det med meg litt utover, så er plutseleg VM der, seier han.
Men fram til jul vert det avslapping for den regjerande norgescupmeisteren i Swift. Men like etter jul må godsakene leggjast vekk om han skal nå matchvekta til VM.
– Etter jul må peparkakene og den slags bytast ut med grønsaker. Så vi får kosa oss mest mogleg no når vi kan, sluttar han.
