Medaljedryss til Trio etter NM i triatlon

Fem Trio-utøvarar reiste før helga til Arendal for å delta på laurdagens Hove Tri. Fire av desse stilte til start i Norgesmeisterskapen. Og etter eit blodslit gjennom 750 meter symjing, 21 kilometer sykkel og 5 kilometer løping, kunne alle av Trio sine fire NM-utøvarar jubla for medalje.

– Vi kom på podiet alle som stilte i NM, ein laginnsats vi er strålande nøgde med, seier Kenneth Blom.

Svelgde saltvatn

Han er sjølv ein ringrev å rekna i triatlon-sirkuset, og kunne etter laurdagens NM i Arendal henga nok ein medalje på plass inn i eit allereie rikt medaljeskap. Blom klokka nemleg inn til tida 1,15,05 og vart med det nummer tre i klassen M55.

– Eg er ikkje heilt nøgd med prestasjonen. Eg hadde større ambisjonar, og eit potensiale til å vinna, men av og til så har ein konkurrentar som er betre, seier Blom.

Heller ikkje Ronny Nordal er heilt nøgd med resultatet. Det til tross for at han klokka inn til 1,12,07, ei tid som var 7. best i heile feltet og som førte Ronny opp på ein 2. plass i aldersklassen M40.

– Eg er ikkje heilt nøgd med gjennomføringa. Det var ein del vind og bølger, noko som igjen førte til eit godt inntak av saltvatn under symjinga. Heldigvis fekk eg kontakt med Kenneth på slutten, sånn at eg kunne halda beina hans inn til skiftsona, seier Ronny.

Utfordrande

Dei store mengdene med saltvatn som Ronny svelgde under symjinga, førte vidare til magekrampar og stive lår.

– Etter ein hard sykkeletappe vart også løpinga tøff. Første runde var forferdeleg hard, men det losna heldigvis då vi gjekk ut på andre runde, utan at eg fekk kontakt med han som leia, seier Ronny, som også rosar arrangørane.

Bente Hellevik fekk på si side ein utfordrande etappe på sykkelsetet, i det som var ei krevjande løype. Men med raskast tid av alle i sin klasse på løpinga, kryssa Bente mållinja til tida 1,27,39. Ei tid som sendt Bente opp på ein tredjeplass i klassen K50.

– Eg er ikkje heilt nøgd med bronsen. Målet var medalje, men dårleg sykkel og ei teknisk krevjande løype med mykje vind gjorde det utfordrande. Men eg er nøgd med at eg var best i mi aldersgruppe på løpsetappen, seier Bente.

Strålande nøgd

Trude Sundsteigen var også med å fargeleggja pallplassane raude og blå denne laurdagen. I eit sterkt felt, kjempa kvinna frå Husnes seg opp på ein 3. plass i klassen K45 med tida 1,23,54.

– Det var gøy. Gruppa mi var ei sterk gruppe, så eg er veldig nøgd med bronse. Det var ei kjekk helg i strålande sommarvêr, seier Trude.

Sjølv om triatlon er ein individuell idrett, reiste Trio-gjengen som eit lag og gjorde litt meir ut av helga i Arendal då dei fyrst var der.

– Vi valde å bu i lavvo på området, og hadde ei veldig kjekk sosial helg. Etter løpet så drog vi ut i båt og nøyt finvêret. Ei strålande helg, seier Kenneth Blom.

I tillegg til kvartetten med medalje, debuterte også Trio-løpar Tor Harald Bringedal med sin første sprint-triatlon i Arendal. Han deltok utanom NM-klassane og kom i mål på tida 1,26,32.