– Me vurderer framleis korleis me skal gå vidare

Dette kjem fram i eit brev til kommunen der statsforvaltaren, ved miljødirektør Kjell Kvingedal, grunngjev avslaget med mangelfullt opplyst søknad, manglande planavklaring og manglande avklaring av årsak til dårleg miljøtilstand på lokaliteten.

Færre artar

I konklusjonen står det at miljøgranskingane på lokaliteten Trommo har synt dårleg tilstand. Statsforvaltaren meiner at staden er forureina av kopar. Ved dårleg miljøtilstand skal utbreiinga av forureininga kartleggjast.

– Ved dårleg miljøtilstand skal det gjerast tiltak i samråd med miljøstyresmaktene. Andre tiltak som kan gje grunnlag for å halda fram med produksjonen på Trommo må vurderast, og flytting av anlegget er berre eit av fleire mogelege tiltak, seier han vidare.

I dokumenta kjem det også fram at botnfaunaen på Trommo har endra seg over tid. Frå sju artar fordelt på 5462 individ i 2010, til tre artar fordelt på 149 individ i 2022.

– Det er velkjent at høg organisk belastning fører til at færre artar overlever. Dei artane som toler belastninga, vil derimot normalt bli svært talrike som følgjer av rikeleg tilgang på mat, fortel statsforvaltaren i dokumenta.

Statsforvaltaren skriv også at før utsleppsløyvet frå 2006 kan oppdaterast må desse vilkåra vera på plass:

1. Utbreiing av dårleg miljøtilstand ved lokaliteten og årsaka til denne må kartleggjast.

2. Tiltak ved miljøtilstand må avklarast med Statsforvaltaren.

3. Eventuell flytting av anlegget skal vera i samsvar med arealdelen i kommuneplanen for Kvinnherad kommune.

Svarar

Då Grenda tok kontakt med Mowi for å få svar på kva dei tenkjer om avslaget og kva som er neste steg vidare, fekk me dette svaret på epost:

«Me vurderer framleis korleis me skal gå vidare med denne saka, så me må dessverre koma tilbake til deg på detaljane i dette ved eit seinare høve. Men det er fisk som framleis ikkje har nådd slaktevekt i anlegget i dag, så dette er ei krevjande sak for oss».