– Me har ein kjønnsdelt yrkes- og utdanningsmarknad
Arbeids- og inkluderingsminister Marte Mjøs Persen var hovudtalar for dagen, og tok seg god tid til dei over 100 frammøtte.
Publisert
Sist oppdatert
– Gratulerte med dagen! Me skal feira våre sigrar, og markera dei kampane me ikkje har vunne enno, opna statsråden.
Ho brukte innleiinga på sin tale til å halda temaet nær hennar eige fagfelt.
Annonse
– Kvinner heng etter på løn, jobbar deltid og blir seksuelt trakasserte i arbeidslivet. Me leverte ein proposisjon til kongen i statsråd på førre fredag der regjeringa styrkar rettane til dei som blir trakasserte på jobb. Det syns eg er viktig arbeid, sa Mjøs Persen i starten på hennar 45 minutt lange tale.
Tryggleik på arbeidsplassen
Ho trekte fram arbeidet Ap/Sp-regjeringa har gjort for likestillinga i dei halvanna åra dei har styrt landet, og takka arrangørane for at dei sette likestilling på agendaen. Ho slo fast at ein er komen langt i Norge, og slo også fast at det er nokre illusjonar me lever med framleis:
– Det er lønsskilnader, og me har ein kjønnsdelt yrkes- og utdanningsmarknad, fortalte ho forsamlinga.
Annonse
Heiltidsstillingar er ei av fanesakene til ministeren, og ho meinte kulturendring hos arbeidsgjevarane måtte til. Ho trekte også klare parallellar mellom seksuell trakassering og tryggleik på arbeidsplassen.
– Det handlar også om tryggleik for å behalda jobben. Arbeidsmiljøet er viktig for kvinnehelsa, vurderte ho.
Kvinnehelse var eit hovudtema for kvelden, og ministeren hadde sine tankar kring temaet.
– Ein må utjamna dei store helseskilnadane, og ein treng meir kunnskap om korleis kvinner si helse er, sa Mjøs Persen.
