– Me er stolte og takksame

Det sa Ann Kristin Næss etter å ha erklært den nye volleyballbana på Varaldsøy for offisielt opna med snorklipp laurdag.

Det var duka for opning med både turnering, grillmat, frukt og talar då den nye volleyballbana på Varaldsøy offisielt vart erklært opna laurdag. Eldsjelene bak, lokalbefolkninga og tilreisande var samla for å få med seg den store hendinga, og idrettsgleda var på topp.

Det er Varaldsøy Idrettslag som står bak prosjektet, og bana vart til med midlar frå Mowi og Eide Fjordbruk. Ann Kristin Næss ynska dei frammøtte velkommen.

– Me er utruleg glad for at så mange kunne komma idag. Dette er eit prosjekt me er svært stolte av, og me kunne ikkje klart det utan dei trufaste sponsorane våre. Dei er med å realisere alle måla me har i idrettslaget, så tusen takk til Mowi og Eide Fjordbruk. For at me skulle koma i gang med prosjektet var me også heilt avhengig av ein entreprenør, det var nemleg mykje graving og drenering som skulle til. Her fekk me god hjelp frå Haldor Øye, på rekordfart, fortel Næss og held fram.

– Ideen om bana kom frå at mange er og har blitt svært interessert i volleyball. Men for å trena må ein til Hatlestrand. Dette fekk ein ikkje lov til under koronatida, og idrettslaget fann difor ut at ein volleyballbane måtte til. Me søkte om midlar og var utruleg heldige. Mowi og Eide Fjordbruk gav oss dei pengane me trengte, som var 150 000 kroner. Me har realisert planen vår og det er me stolte og takksame for. Tusen takk til dei fantastiske folka som har hjelpt oss, smiler ho.

Snorklipp og turnering

Strand-Ulv-spelaren Emma Sandvik Rødal fekk æra av å klippa snora som eit symbol på sjølve opninga.

– Det er fantastisk at me no har ein volleyballbane på Varaldsøy. Det betyr mykje, og no slepp me å reisa til Hatlestrand berre for å driva med eigentrening og slikt. Me har allereie nytta oss godt av bana, og det er kjekt å ta familiemedlemmar med her, seier det unge volleyballtalentet.

Den nye bana stod klar i påsken, men opninga har dei vilja venta med til sesongen for sandvolleyball nærma seg. Ann Kristin Næss bur like ovanfor bana, og fortel at den har blitt flittig brukt frå byrjinga av.

– Familiar, barn og ungdommar har allereie nytta bana godt, og det er svært kjekt å sjå. Denne bana er noko alle kan ta i bruk, og til no er det faktisk barnehagen som har nytta den mest, fortel Næss.

Etter snorklipp og talar fekk både små og store delta på volleyballturnering. Heile 20 lag var påmeldte, og det vanka premie til både 1. -, 2.- og 3.-plass. I tillegg fekk alle under ti år kvar sin pokal. Det var god stemning og flotte prestasjonar frå start til slutt. Vinnarlaget var ekteparet Kristian og Solveig Morken Bjelland.