– Me driv politikk, ikkje ein kyrkjelyd

Førstekandidaten til Krf Alf Jarle Langeland presenterte fredag valprogrammet saman med andrekandidat og medkummulert Inger-Elin Nesheim og tredjekandidat Elisabeth Boge. Det vart gjort utan store fakter og lovnader om omveltingar.

– Me har ikkje fylt programmet med store, revolusjonerande saker. Me er nøkterne, og vil prioritera at Kvinnherad kommune har kontroll på økonomien. Pengebruken må roast ned litt, for lånegjelda vår er blitt høg, sa Langeland.

– No skal me byggja ny barneskule på Husnes. Me vil helst at ein betaler litt ned på den før ein går i gang med neste prosjekt, og helst vedlikehalda og oppgradera det me allereie har, heldt Langeland og Nesheim fram.

Helsehjelp

Den første fanesaka som KrF løfta opp i programpresentasjonen var styrking av psykisk helsehjelp.

– Me vil at ein skal få hjelp raskt. Det er viktig å få det på plass, sjølv om det kostar litt, og difor ynskjer me å styrka den kommunale psykiatrien. Det betyr fleire stillingar og eit styrka informasjonsarbeid innanfor dette. Me ser også for oss at dette kan koplast saman med ei styrkinga av helsesjukepleiarane i skulen, sa Langeland og fekk støtte av Nesheim og Boge.

– Eg veit det er mange som slit psykisk, og me ynskjer at alle skal ha det godt. Det er ringverknader når nokon slit, og det går også utover resten av familien, utfylte Boge.

I forlenginga av temaet vart også dagsenter for personar med demens løfta opp som ein KrF-prioritet.

– Det er også ein hjartesak for oss å få på plass eit tilrettelagt dagtilbod for personar med demens som framleis bur heime. Det vil både gje ei god avlasting til familien, trudde partitoppane.

Fritidskort

Av andre fanesaker kjem fritidskortet høgt opp på lista til Kvinnherad KrF.

– Det er ikkje kome på plass, sjølv om det vart vedtatt i budsjettet for 2023. Me ynskjer ikkje at økonomi skal hindra nokon i å ha eit meiningsfylt liv, og me kan trenga at ein deltar i aktivitetar no etter pandemien. Fråfallet i ungdomsidretten uroar, og me ser at det er mange aktivitetar som etter kvart byrja å kosta mykje, sjølv den kommunale kulturskulen, så me vil at kortet skal gjelda for alle og opp til 18 år, påpeika Inger-Elin Nesheim.

«Hent meg-buss» er eit anna konkret tiltak KrF ynskjer å sjå etablert i Kvinnherad.

– I Kvinnherad har me spreidd busetnad og dårleg busstilbod, og me treng ei meir fleksibel bussløysing. Me trur at «Hent meg» er ei eit godt tiltak for både gamle og unge, sa Elisabeth Boge.

Folketal

Elisabeth Boge (18) er ungdomskandidaten, og truleg den yngste som stiller til val i år. Inger-Elin Nesheim (41) er kanskje eit umerittert namn i politisk samanheng, men ho har til å slekta på. Både pappa Geir Inge Sjo og ikkje minst morfar Jan Koløy har begge lang fartstid i Frp. Alf Jarle Langeland har nær 40 års fartstid i KrF, og er senioren i topptrioen.

– Me har altså ei god blanding og godt spenn her, smilte Langeland.

Til liks med fleire andre parti er Kvinnherad KrF opptatt av folketalsutviklinga i Kvinnherad.

– Me treng fleire innbyggjarar. Kvinnherad er ein kommune kor det er godt å bu, me har dyktige tilsette, gode skular og barnehagar og mange gode arbeidsplassar, skrytte Nesheim og Langeland.

Eit tiltak frå KrF for å lokka opp fødselstala er gratis barnehage frå barn nummer 3.

– Me har allereie gratis SFO å lokka med. Samtidig ser me ikkje korleis me skal finna dei 15-20 millionane som trengs for å gje gratis barnehage til alle.

– Korleis vil de finansiera tiltaka dykkar?

– Eg har kvidd meg litt til det spørsmålet, for me har ikkje ein spesifikk plass me vil ta det frå. Me vil først og fremst halda igjen på investeringar, sa Langeland.

På det evige skulestrukturspørsmålet er svaret «ingen store endringar».

– Me er opne for samordningar. Det pedagogiske tilbodet avgjer, saman med geografi. Éin skule på Halsnøy fungerer, og me foreldra er godt nøgde, men me har ikkje lyst å vera kategoriske på løysing, kommenterte sæbøvikingen Nesheim.

Som eit lite parti har KrF ambisjonar om tre representantar i kommunestyret dei neste fire åra. Ambisjon om å styra kommunen, har derimot ikkje Alf Jarle Langeland.

– Me er opne for samarbeid i alle retningar, og eg syns me har eit godt klima i Kvinnherad til å vera politikar i, men eg er ikkje ordførarkandidat, rett og slett. Det Krf skal vera, er eit ansvarleg sentrumsparti. Og så driv me politikk, ikkje kyrkjelyd, slutta Langeland.