– Me bur og lever i naturen

Ivan Smisek (56) flytta først til Noreg og Kvinnherad i 2011. I 2005 vart han tilsett ved Harding som ingeniør, og arbeida dei første åra i heimlandet sitt, før han flytta til Kvinnherad der han hadde sin arbeidsstad på Seimsfoss. På denne tida budde han ovanfor Snikkeriet i Rosendal. Men som fleire andre mista Ivan jobben sin i 2015. No er han attende i Rosendal, men denne gang på ferie saman med kjærasten Petra Honcikova (48).

Grenda møter paret på Snikkeriet tysdag, der bileta til Ivan prydar veggane. Ivan og Petra kjem rett frå fjelltur, han berrføtt og ho med berrfotsko. Nysgjerrig som eg er må eg stilla spørsmålet:

– Kvifor går du utan sko, kjem de ikkje rett frå fjellet?

– Jo, men treng me sko for å kunne gå då? ler han, før Petra kjem med ei nokså forståeleg og interessant forklaring.

– Å gå utan sko, eller med berrfotsko er svært bra for kroppen og helsa. Beina våre har mange biologiske aktive punkter og soner, og når me då går berrfot blir alle desse sonene aktivert. Stimulering av enkelte områder kan til dømes bidra til å forbetre funksjonen til de indre organa våre og auka immuniteten.

– Det er rett og slett gratis massasje å gå utan sko, legg Ivan til.

Bur og lever i naturen

Då Ivan flytta til Noreg i 2011, tok det ikkje lange tida før han vart fascinert og knytt til naturen. Han kjøpte seg eit digitalkamera for å foreviga dei flotte augneblikka han fekk oppleva, utan baktanke om at bileta hans ein dag skulle bli utstilt.

– Fotografering var jo eigentleg berre ein hobby, men etterkvart som folk fekk sjå bileta mine vart eg fortalt at dei burde delast med andre også. Eg har etter det hatt to utstillingar i heimlandet mitt, og no her i Rosendal. Eg kjenner jo til eigaren av Snikkeriet, og sendte difor bileta mine til henne. Ho spurte deretter om eg kunne tenkja meg å stilla dei ut her i lokalet, fortel han.

Alle bileta som er utstilt har motiv frå naturen i Rosendal og andre stader i Kvinnherad. Til dømes er fleire av bileta tekne i Steinparken, Baroniet Rosendal, Fjellhaugen og Malmangernuten. Det er såleis ikkje overraskande at naturen er ein stad kor Ivan finn inspirasjon. Han kallar nemleg naturen for heime.

– Eg elskar naturen, spesielt her i Kvinnherad. Her finn du alt. Fossefall, elvar, fjell og sjø. Det er heilt nydeleg. Denne gong skal me vera i Kvinnherad i tre veker, og då bur me ikkje på hotell og slikt. Me bur og lever i naturen, seier han, som om det skulle vera heilt sjølvsagt.

Overnattingsstaden er ulik frå dag til dag, og då Grenda snakkar med paret tysdag skal dei forflytta seg til ei strand i Dimmelsvik.

– Anten søv me i telt eller under open himmel. Det er fantastisk, smiler dei.

Fantasi og vinklingar

Totalt heng det tjuefem naturbilete på lerret på Snikkeriet, alle med kvar sitt personlege namn. Under opninga fredag vart sju av dei selt.

– Eg bruker berre eit enkelt digitalkamera, og eg redigerer aldri bileta mine. Naturen og lyset er perfekt slik det er. Når eg går rundt i landskapet bruker eg fantasien min, og det er tilfeldig kor eg endar opp og kvar eg tek bilete. Det er som regel naturen som seier; «Ivan, du treng meg i kameralinsa», seier han og held fram.

– I tillegg jobbar eg mykje med vinklar. Mange av bileta som heng her er frå same stad, og kanskje av same gjenstand eller landskap, men dei blir totalt forskjellege ettersom eg tek bilete frå fleire ulike vinklar.

Tilbakemeldingane han får er svært gode, både frå heimlandet og her i Kvinnherad.

– Då eg har hatt utstilling i heimlandet mitt presenterer eg kvart bilete og fortel om opphaldet mitt her i Kvinnherad. Det verkar som dei synest det er kjekt å høyra om, og likar spesielt godt utsiktsbileta frå fjella her. Under opninga i Rosendal stilte dei besøkjande spesielt spørsmål kring mine opplevingar og tolkingar av naturen. Eg trur dei synest det er kjekt når dei kjenner igjen staden på bilete, fortel han.

Utstillinga kjem til å stå fram til 26. august.