MDG med lokalt budsjettforslag

– Bygningsmassen i Norge må halvera energiforbruket for å frigjera ei etterspurd vare, som straum er. Me tar det no fordi dette er det viktigaste tiåret for det grøne skiftet, seier Jostein Saghaug når han argumenterer for MDG sine forslag til budsjett.

Solceller

Fokuset i forslaget er satsing på energieffektivisering. Partiet tar til orde for å redusera straumforbruket i bygg der kommunen betalar straumrekninga med 50 prosent innan 2030, mål mot forbruket i 2020.

– Forbruket skal reduserast med minimum 10% frå 2020 til 2022, deretter minimum 5% kvart år fram til 2030. Nødvendige investeringsmidlar vert lagde inn i budsjettet, skriv Saghaug i forslaget.

MDG vil også at 3 av dei 15 millionar kronene som Kvinnherad kommune krev inn i eigedomsskatt frå private huseigarar årleg, skal gå til stimuleringsmidlar for utbygging av solcelleanlegg hos private.

– Stønadsbeløpet kan vera inntil 15% av kostnadane ved solcelleanlegget. Det vert føreslege å fordele beløpet 2 gonger kvart år, skriv MDG i forslaget.

Dei viser også til at det i planperioden skal rehabiliterast fleire skular, og at ein må i dette arbeidet ha særleg fokus på energieffektivisering.

– Kommunedirektøren må leggja fram sak for kommunestyret i løpet av året der ein vurderer mogelegheit for solcelleanlegg på kyrkjer i kommunen, legg MDG til.

Breie samarbeid

– Me vil ha det inn no grunna bygginga av Kvinnherad Arena, og ein skal oppgradera skular der ein også må tenkja på dette frå første timen ein planlegg oppgradering. Me håper på ei brei støtte i kommunestyret for dette, slik at kommunedirektøren må ta det inn i deira planar. No er det skjedd ei endring i kommunestyret, og det blir breie samarbeid for å få fleirtal for mellom anna budsjett, og me håper å få med oss mange nok til å få vedtatt dette, seier Saghaug til Grenda.

MDG ynskjer også å stryka reduksjonane som kommunedirektøren foreslår i barnehagebudsjettet for tilbodet for barn som har behov for ekstra merksemd, og kjem difor til å oppretthalda tilbodsnivået til desse barna i alternativt budsjett. Dei vil også fremja forslag om å auka kommunalt bustadtilskot til tre millionar kroner.