MC-klubben opnar lokala for ungdomen

Kommune sitt ungdomsteam har gått inn i eit samarbeid med MC-klubben der dei stiller sitt lokale til disposisjon for mekkeglade ungdomar.

– MC-klubben stiller med sine imponerande fasilitetar, medan me stiller med personalressursane. Det blir Jon Steinar Vivelid som blir instruktør også denne gongen. Han er ein fantastisk dyktig mekanikar, ekstremt dyktig med motorsyklar men også god med ungdomar, fortel avdelingsleiar for eininga barn og familie Vigdis Gammelsæther.

– Her kan ein ta med seg sitt eige prosjekt, eller me kan finna eit prosjekt som dei kan vera med å mekka på, forklarer ho vidare.

Sosialt også

Kursinstruktøren Jon Steinar Vivelid er klar på at det er viktig med ein samlingsplass der ein kan treffa likesinna og føla seg velkomen.

– Me har lyst til å bidra for ungdomen sin del. Det er bra at dei har andre ting å gjera enn å spela dataspel eller ikkje gjera noko ting. Det er bra å kunna gjera forskjellige ting og ha gode relasjonar me dei rundt deg, det gjer ein meir rusta i livet, seier Vivelid.

Vivelid håpar også at slike kurs vil bidra til å gjera ungdomane meir bevisste sitt ansvar og gjera dei meir sjølvhjelpte, men samtidig også betra miljøet og samhaldet dei i mellom.

– Dei skal jo læra seg litt meir om å skru, men også få forståing for ting som har med sikkerheit å gjera. Det gjeld ting som både bremsar og lufttrykk. Det er ikkje alle som forstår viktigheita av det, men det er ting som er viktig for både køyreglede og sikkerheit, understrekar Vivelid.

– Samtidig har me også lyst til å få til eit endå betre miljø og samhald mellom ungdomane, og skapa noko positivt og gjera ting i lag. Både eg og MC-klubben stiller oss positive og ynskjer å bidra, og me er interessert i at ungdomen skal kunne koma og bruka klubbhuset og vera der. Eg tenkjer me må ordna noko pizza, cola og musikk, og gjera noko sosialt ut av det også, legg han til.

Manglar plassar

Grunnen til at dei i år vel å leggja mekkekurset til Husnes-området, er at dei merkar eit større engasjement kring mekking der enn lenger innover. Det seier Kvinnherad MC-klubbleiar Svein Arne Holmedal seg einig i.

– Det at me har fått Jon Steinar med oss er absolutt positivt. Både han og kona er med i styret og har vore eldsjeler i klubben lenge. Han har også hatt andre slike prosjekt, men me ser eit større potensial ved å overføra det til Husnes. Engasjementet kring mopedar og mekking har vore større rundt ytre luten, men det gjeld også å ha rette personen. Eg føler Jon Steinar kan bringa dette til ein bra ting, poengterer Holmedal.

– Me har vore med i gamet ein del år, men me treng ungdomar som kan bli med og styra huset. Me treng rekruttering og dei manglar plassar å vera og plassar å køyra. Det er noko som absolutt burde vore tilrettelagt betre av kommunen, legg han til.

Kurset vil gå over fem tysdagar frå slutten av april.