Mauricio overvelda over all støtte og engasjement

– Det gjekk veldig bra! Eg er stolt over elevane som spelte så godt. Me hadde ein plan, og utførte oppgåva perfekt. Det var umogleg å slå ein så stor gjeng med dansarar, men me fekk det beste resultatet som var mogleg å få, trur eg, seier Mauricio.

Heile Kvinnherad sin slagverk-helt er slett ikkje skuffa over at han ikkje vann Norske Talenter.

– Nei, nei, nei, ikkje skuffa! Eg er berre stolt og glad og veldig overvelda over alle dei gode tilbakemeldingane og støtta eg har fått frå heile Noreg, frå både kjente og ukjente.

Berre kjempekjekt!

Mauricio kjenner også på takksemd for engasjementet frå heimkommunen.

– Eg er så glad for alle foreldra som heiv seg rundt, og at det var ein så stor gjeng på 30 folk frå Hatlestrand som vart med. Det møtte også opp andre kvinnheringar i salen, folk som har vore med på ungdomsbasen og tidlegare marimba-elevar. Det er berre kjempekjekt!, utbryt han.

Han meiner det fort vert for mykje fokus på det å vinna, medan han sjølv er meir oppteken av opplevinga han har hatt gjennom dette eventyret.

– Det var nokon av dei unge som var litt skuffa rett etter finalen, og det skal dei få lov til å vera. Men eg trur me må vekk frå den der «winner takes it all»-mentaliteten. Tenk alt ein opplever saman og tek med seg vidare frå dette her! Det er det viktige. På frukosten i dag tidleg, var det berre god stemning blant alle saman!, fortel Mauricio.

Lilli Britt Urheim, rektor på Hatlestrand skule, meiner opplevinga var heilt fantastisk. Ho fortel om ein svært lærerik dag for elevane i går.

– Du veit, me har aldri vore med på ein TV-produksjon før, så det var veldig lærerikt å oppleva korleis det var å jobba med eit så stort apparat.

Køller som forsvann

Fredagen var prega av mykje venting og litt øving på scena innimellom.

– Me måtte øva fleire gonger, for folka i produksjonen måtte finna ut korleis dei skulle plassera marimbaane rett, og korleis dei skulle hjelpa ein elev med krykker å koma seg på scena, så det var mykje detaljar som skulle på plass.

Nokre av elevane fekk oppleva kor spennande det kan vera å framføra noko live.

– Under øvingane og generalprøven vart køllene plassert sånn at dei hang fast på marimbaen. Men under sjølve finalen vart dei lagt oppå marimbaen, og då var det sjølvsagt ei kølle som datt ned og vikla seg inn i eit teppe. Det vart litt arbeid for eleven, men han klarte no å få tak i den til slutt og spela som planlagt, ler rektoren.

Sjølv om nokon var litt skuffa det siste kvarteret av kvelden, hadde dei også svært gode reaksjonar på opplevinga. Lilli Britt fortel at det var fleire som alt no byrja å reflektera over kor stort det var å få vera med på dette. Dei fekk også ei flott erfaring med å spela framfor så mange folk.

Godt å koma heim

– På øvingane og generalprøven var det jo tom sal. Så nokon av elevane var heilt i hundre etter sjølve finalen når det var fullt av folk som såg på. Fleire fortalte at dei fekk ein fantastisk energi frå publikum.

Lilli Britt Urheim vil trekka fram at alt dette kjem av at Hatlestrand fekk heildagsskule, og avtala som skulen fekk med kulturskulen då heildagsskulen starta.

– Det var gjennom samarbeidet med kulturskulen at me fekk Mauricio til skulen vår, og det set me veldig pris på!, seier ho.

No er gjengen på veg heim att, og det er ein letta trommis som nærmar seg flyplassen.

– No skal det bli veldig deilig å koma heim, og ikkje planlegga eller tenka meir på akkurat Norske Talenter. No er det på tide å starta nye prosjekt, ler Mauricio.