Måtte trekka seg ut av Kvinnherad: – Det skjedde litt fort
Etter godt og vel eitt år i Rosendal såg Berg Gull og Sølv førre veke seg nøydd til å takka for seg.
– Det var kanskje ikkje heilt uventa, men likevel litt brått og brutalt. Det har vore nokre hektiske dagar med flytting midt i julestria, fortalde butikkeigar Annette Melkeraaen.
Etter at Hauso fekk nokre sjukemeldingar, i tillegg til at ho også sjølv ikkje heilt har helsa med seg, vart det plutseleg ikkje lenger nokon veg utanom. Utsalet som gullsmedbutikken hadde dei siste månadane frå Fredheim Blomster i Rosendal, har no teke slutt.
Annonse
Mykje eigeninnsats
– Eg har to butikkar, og når eg då mista 1,1 årsverk, i tillegg til at eg sjølv har MS, så er det litt vanskeleg å strekka strikken heile tida. Det vart rett og slett manko på folk, ikkje nok tid til å læra opp folk, samt at det er vanskeleg å få folk inn i halve stillingar. Det er faktisk vanskeleg å få tak i folk i det heile, forklarer Melkeraaen.
– Eg har også fått fleire tilbakemeldingar frå familie om at ein kanskje ikkje kan driva med alt ein har lyst til når ein ikkje har helse til det. Det var eit prøveprosjekt, og sjølv om butikken til Mette var veldig koseleg og eg gjerne skulle hatt med meg julesalet, så gjekk ikkje det dessverre, fortset ho.
Onsdag i førre veke vart avgjerda teke, og allereie fredag og laurdag var dei inne for å tømma butikken for varer.
Annonse
– Det skjedde jo litt fort. I fjor tapte me mykje inntekt tett opp under jul, og i år må me gje oss like før jul. Det har vore veldig triveleg i Rosendal og mange hyggjelege kundar, og me har gjort fleire forsøk på å få det til, men det krev mykje eigeninnsats. Og akkurat det har eg ikkje lenger grunna eiga helse, understrekar ho.
Utkøyring
Likevel er ho tydeleg på at Berg Gull og Sølv ikkje forsvinn.
– Me kjem jo framleis til å ha butikken inne i Odda, og der kan folk bestilla varer og få dei frakta til Rosendal eller heim. Enn så lenge så kjem me til å ha køyring til Kvinnherad to gonger i veka, men så håpar me jo at me også kjem til å få besøk frå Rosendal. Spesielt no når vegen blir så fin, så håpar me at folk gjerne tek turen til Odda, avsluttar Melkeraaen.
