Måtte gjera nytt vedtak om eigedomsskatt

Då kommunestyret i desembermøtet vedtok 1,7 promille i skattesats til båthamner, gjorde dei eit ugyldig vedtak, då kommunestyret ikkje har mynde til å vedta kva skattesats som skal nyttast på ein eigedomskategori eller enkelteigedom utover differensierte skattesatsar etter eigedomsskattelova.

Saka måtte derfor handsamast på nytt i kommunestyret på torsdag, der vedtaket fekk tilbakeverkande kraft frå 1. januar.

Eigedomsskattekonsulent Per Harald Havnen Löfgren Johansen presiserte til kommunestyret kva mogelegheiter dei har. Kort oppsummert kunne dei frita naust, båthamner og klubbhus for eigedomsskatt, krevja skatt på alt og dei kunne gå for ei mellomløysingar, som var der innstillinga låg. Klubbhus fritak som det er hos andre, medan nausta og båthamnene skal ha eigedomsskatt.

Debatten kring saka vart dominert av Ove Lemivka (Frp) og Gaute Lund (SF). Dei står ikkje overraskande på kvar sin ytterkant i saka. Lund var tydeleg på at ein båtplass er eit privat eigedom.

– Dugnad i nærleiken er saka uvedkomande. Det er privat eigedom, argumenterte han.

Øyvind Lernes (H) konkluderte med at ein må gjera eit vedtak som er lovleg.

– Som eit apropos betaler Rosendal Hamn 67 kroner pr. båtplass i eigedomsskatt. Det kostar meir å krevja inn skatten enn det ein får inn, kommenterte Lernes.

Etter eit gruppemøte for å semjast om vedtak, presenterte Ove Lemicka kva møtet hadde landa på.

– Me har hatt ein god runde på dette no. Konklusjonen er at det uansett er vanskeleg å finna løysinga. Det er semje om å ikkje gjera endringar fordi me held på med eit utgreiingsarbeid, og ein har sett ned arbeidsgruppe som skal sjå på ordninga med eigedomsskatt. Det arbeidet skal vera klart til budsjett 2023. Inn til då skal det vera som det er no, oppsummerte Lemicka.

Kommunestyret stilte seg samrøystes bak det nye forslaget.