Materialmangel tvinger Herde til å permittera

Utviklingssjef Kristine Moldenhauer Biseth stadfestar at det er 27 som har fått permitteringsvarsel.

– Det er tilsette i støyperiavdelinga som har fått varselet, som gjeld frå januar og fram til påske. Bakgrunnen for at me må permittera er lang leveringstid på material til dei nye ordrane våre, forklarer Biseth.

Ho er lova å ha materiale på plass til påske, men kryssar fingrane i håp om at det kan koma til Ølve før den tid.

– Me får ikkje seia noko om kva ordre det er me ikkje får starta. Det er kjekt å ha ordrar, men dei er ikkje offentleggjorde av dei som har gitt oss kontraktane. Me har altså ordrane, men ikkje materiale til å starta opp produksjonen av dei, utdjupar ho.

Det var Kvinnheringen som først omtalte permitteringsvarsla.