Martin vann norgescuprenn

Det var ingen som klarte å tukta Hålandsdalen-utøvaren på sprinten. Martin varta opp med god skyting, og hadde bra fart i sporet. Han vann med ein margin på åtte sekundar.

Det mest oppløftande var at Femsteinevik vann sjølv om han ikkje hadde noko toppdag, korkje i sporet eller på standplass. Han var likevel meir stø på avtrekkaren enn flesteparten av konkurrentane i norgescup-rennet.

– Eg tar med meg at eg har levert brukbare prestasjonar og har fått gode svar. Det blei første og fjerdeplass sjølv om eg ikkje hadde noko rå kjensle nokon av dagane. Det er vonleg ein indikasjon på at eg har litt å gå på formmessig. Eg hadde ikkje ladd opp noko spesielt til desse renna. Dei kjem midt i ein forholdsvis tøff treningsperiode, sa Martin til lokalavisa.

Fylgde opp i norgescupen

28-åringen tar ikkje av sjølv om han gjorde det bra i Blink-festivalen, og fylgde opp med to gode konkurransar då norgescupen i rulleskiskyting vart innleia.

Femsteinevik føler det er vanskeleg å leggja for stor vekt på det som skjedde i Blink-festivalen, ettersom det er korte distansar og litt spesielt å konkurrere der. Men han tok med seg fleire gode opplevingar heim frå Sandnes.

– Eg sleit litt med sjukdom i sommar og i forkant av Blink-festivalen. Det førte til at eg mista ein del treningstimar. Etter dette har det meste gått etter planen. Det har blitt nokre gode treningsveker no. Forhåpentlegvis får eg utteljing for det framover, og ikkje minst til vinteren, sa Femsteinevik som no går inn i nokre viktige veker og månadar på treningsfronten.

Må halda seg frisk

– Det blir særleg viktig å gjera dei rette tinga slik at eg minimerer sjansen for sjukdom og treningsavbrot. Det er umogleg å gardere seg mot det, men det er mogleg å gjera tiltak som gjer at eg er mindre utsett for sjukdom. Dei siste åra har sesongopninga på Sjusjøen vore dei viktigaste renna for oss som har ambisjonar om å konkurrere internasjonalt. Der blir det viktig å prestera.

– Kvifor har det blitt så viktig å prestere i den internasjonale sesongopninga?

– Dei som har blitt tatt ut til dei første IBU-cuprenna, har som oftast gjort det så bra at det er vanskeleg å slå seg inn i den troppen. Det har vore lettare å forsvara seg til ein plass i IBU-cuptroppen, enn det har vore å koma inn gjennom gode prestasjonar i norgescupen, sa Martin til Grenda.

Det er ein dedikert skiskyttar, som er ærleg på at han skal gjera det som er mogleg for å toppa forma til Sjusjøen-renna i november. Før han kjem dit ventar både norgesmeisterskapen i rulleskiskyting og ikkje minst ein halvannan vekes treningsleir i austerrikske Obertilliach kor Ole Einar Bjørndalen i mange år hadde base.

I tida framover blir det viktigare enn nokon gong å få kvalitet i treninga.