Martin med sensasjonelt comeback i IBU-cupen

Fem år etter at han siste konkurrerte ute i den store verda, gjekk Martin Femsteinevik inn til sølvet på onsdagens 15 kilometer i Slovakia.

Det vart eit draumecomeback for Martin Femsteinevik då han returnerte til IBU cup-sirkuset i slovakiske Brezno-Osrblie onsdag. Det gjorde han heile fem år etter førre IBU-renn.

For etter strålande prestasjonar i Norgescupen den siste tida, vart Martin teken ut til å representera Norge i denne IBU-runden.

Det starta med 15 kilometer individuell start onsdag ettermiddag. Martin gjekk ut som nummer 71 i det i alt 110 mann store feltet, og skiskyttaren frå Hatlestrand hadde verkeleg stilt inn siktet til dette rennet.

Tjue treff av tjue moglege vart fasit, og 28-åringen kryssa mållinja til ei førebels leiing på tida 36:40,9. Ei tid som lenge såg ut til å halda til ein sensasjonell siger, men landsmann Vetle Paulsen ville det annleis.

Paulsen, som starta som nummer 106, kryssa mållinja på ei tid som var 5,9 sekund betre enn Femsteinevik. Og sendte Hatlestrendingen ned på ein sølvplass.