Markerer med gospel, klassiske folketonar og samtidsmusikk

Konserten vil vera med å markera ikkje berre frigjeringsdagen, men også 1000-års jubileet av kristenretten i Norge, samt 750-års jubileet for Magnus Lagabøte si landslov. Med på konserten vert også Rosendal Tweens, kantor Eva Megeysi på tangentar og Corneliu-Dinu Serfezi på bratsj.

Alle i Sunnhordland

Rosendal Tweens er eit kor for barn i alderen 11-13 år som har sunge i lag i mange år.

– Dei vil både vera med oss i Cantus Firmus, i tillegg til å ha eigne innslag. Me gler oss over at desse flotte borna vil kasta glans over konserten vår, seier kormedlem Solfrid Hellesøy Siqveland i ei pressemelding.

Vidare fortel Siqveland at bratsjisten Serfezi er ein ven av kantor Megeysi og til vanleg spelar i Malmø symfoniorkester, som også har halde konsertar over heile europa.

Kristenretten i Norge vart innført ved Mostratinget i 1024, og markerer starten på Norge som ein lovgjevande samla nasjon og peikar fram mot nasjonaljubileet i 2030.

– Kvinnherad kyrkje vart truleg bestemt bygd på dette tinget. Då skulle kyrkja på Skåla vera ei av fire hovudkyrkjer i Hordaland. Dei andre var på Hamre i Nordhordland, Vangen på Voss og Kinsarvik i Hardanger. Kvinnherad kyrkje har vore hovudkyrkje for alle i Sunnhordland, og dette synest me er viktig å markera i denne konserten. Alle i Sunnhordland er hermed invitert, understrekar Siqveland.

Komponisten

Det er Christian Meass Svendsen som har komponert eit stykke for kontrabass og kor som blir urframført på denne konserten. Stykket heiter «Over fjellet».

– Dette er fyrste stykke eg starta å skriva for kor og kontrabass. Idéen om eit stykke for meg og Cantus Firmus kom plutseleg til meg, og eg tenkte: Ja, det kan vera fint, seier komponisten sjølv om stykket.

Dette blir ein konsert med både gospel, klassiske folketonar og samtidsmusikk.