Markerer kjærleik
Laurdag er det duka for årets Pride-markering. For femte året på rad skal markeringa fargeleggja Kvinnherad.
Publisert
Sist oppdatert
Arrangøren av Pride er organisasjonen Romsleg, som vart starta for å feira og fremja mangfald i Kvinnherad.
Utanfor Rosendal Samfunnshus kjem ordførar Vegard Bjørnevik og Christian Bjørgen for å halda appellar, og Endre Olsen frå Stord kjem for å spela musikk for dei frammøtte. Etterpå vert det parade gjennom sentrum.
Annonse
– Det vert ikkje stengt for trafikken i år, men politiet kjem til å vera på plass for å sørga for at alle kjenner seg trygge, fortel leiar i Romsleg Jorun Larsen.
Larsen håpar at folk tek turen, og at det blir ein fargerik feiring av mangfald.
– Dei siste to åra har vore spektakulære når det kjem til fargar og kor mange som har stilt opp. Vi håpar at Kvinnherad viser seg frå si beste side i år også, seier ho.
Vil visa støtte
Annonse
I år kjem butikkane i Rosendal til å visa støtte på kvar sin måte. Bente i Rosendal Bokhandel har allereie sett opp eit utstillingsvindauge til Pride.
– Eg las «Mente dere det» av Thomas Korsgaard og den slo meg verkeleg. Han fortel så godt om ting han har opplevd, frå då han var liten og ville ha ein «My little pony»- hårband og faren fann den største traktoren i butikken og sa at denne kunne han få, til kommentarar som vert slengt, fortel Bente.
Ho vart så rørt at ho avgjorde å laga ei utstilling i vindauget i butikken. Fleire av butikkane hang seg så på, og både Sport1, Fredheim blomster, Rosenform og Hjerte-fryd vil også vere med for å visa kor dei står i forhold til inkludering.
– Eg synest det er supert at folk viser initiativ og sleng seg med på denne måten, seier Larsen.
«Vi ynskjer å oppfordre lokale idrettslag, foreiningar og andre til å vera synlege på markeringa og i paraden, for å visa at me har eit mangfaldig og tolerant lokalsamfunn - der det er trygt for alle å vera seg sjølv. Lag ein kjekk paroleplakat, ta med flagg og faner, eller kom utan, men bli med» skriv Romsleg på Facebooksida si.
