Marius Ripel Jensen feia all konkurranse av banen

– Nei, kva kan eg sei, det har gått veldig, veldig bra, seier den nybakte norgesmeisteren, som allereie laurdag sikra det samanlagte gullet i Sokndal.

Det vart dermed ei roleg feiring, då han også skulle køyra løp på søndagen.

– Det vart to rolege øl. Men i oktober skal me til Gardermoen på bankett, der NM-tittelen offisielt skal tildelast, så det blir kanskje litt meir feiring då, ler han.

Etter førre løp på Vålerbanen låg Marius i ganske overlegen leiing føre finalen, med 44 poeng over nestemann på lista.

– Dei to siste åra har eg vore litt uheldig og mista NM-tittelen, men no gjekk det endeleg vegen i år. Det vart 200 av 200 moglege poeng, og vi har vunne åtte av åtte løp. Det har ikkje synke heilt inn enno at eg har vunne. Det har gått over all forventning eigentleg, seier han.

Tidlegare i sommar fekk gullguten dessutan juling i eit løp då han krasja i 200 km/t. Dei to siste løpshelgene har såleis vore ekstra tunge, og Marius ser fram til å gi kroppen litt kvile dei komande månadane.

Lagarbeid

Trass i den vonde skuldra gjekk det heilt til topps i årets sesong. Gullet er, ifølgje den mørbanka føraren, resultat av eit formidabelt samarbeid mellom teamet, vener og kjente, sponsorar og heile maskineriet han er ein del av.

– At me kom hit i år har mykje å gjera med dei rundt meg, som eg er heilt avhengig av. Denne helga kom det mykje folk frå Kvinnherad, som heia og drog inn sponsorar. Det er ingen tvil om at dette er eit samarbeid, slår han fast.

På Facebooksida til Ripel'n blir dette ytterlegare omtala:

«Vi fekk og tidenes overrasking denne helga frå supporterar og sponsorar som kom. Då dei sette seg i bilane og reiste frå Kvinnherad byrja dei på ein ringerunde til både private og firma for å få inn sponsormidlar og eventuelle nye sponsorar til teamet. Det enda opp med eit monaleg beløp frå både private og firma som ville vera med å støtta. Vi er djupt takksame og rørt over kor mange flotte folk vi har rundt oss, vi har ikkje ord til å takka dykk alle nok.»

Revansje-lystne konkurrentar

Sjølv konkurrentane får skryt av norgesmeisteren.

– Det er eit veldig godt miljø, og konkurrentane har gratulert meg. Vi er gode kompisar i depotet, og gode konkurrentar på banen. Dei er klare for revansje neste år, så vi får sjå, seier Ripel Jensen vidare.

Han lovar elles at han ikkje gir seg sjølv om målet med samanlagt NM-gull endeleg er nådd. Mellom anna leikar han med tanken om å freista seg på løp i England.

– Der er det eit høgt nivå, så eg kunne tenkt meg å prøva meg der, sluttar han.