Marion Woodseth vart lista på NRK P1

– Det var veldig gøy å bli lista, spesielt med låta «Bare du og eg». Fyrste tanken var om me hadde sendt inn feil låt, sidan den er i frå førre slepp. Eg vart overraska, men veldig glad, seier Marion.

Artisten frå Valen har vore lista fleire gongar på P3, men dette var hennar fyrste gong på P1. I tillegg kjem ho med ein ny singel førstkomande fredag. Og lyttarane kan mogleg kjenne den att.

– Den nye låta er ei tolking av ei anna populær låt, som har mange millionar avspelingar. For lyttaren sin del vel eg å halda tittelen hemmeleg enn så lengje, men eg kan røpe at den originale låta er frå 2019, og den vert spelt på radioen, informera ho.

Gode tilbakemeldingar

Den kommande låta hennar er tolka på norsk, og vart til svært tilfeldig.

– Det var veldig gøy å lage den, og det var eigentleg svært tilfeldig korleis den vart til. Då me var ferdig med den, skjønte me at den var nokså lik på ei anna kjent låt. Me måtte difor tenkja i andre banar, for me ville jo ikkje sleppa taket på den. Etter mykje om og men, bestemte me oss for å gjera den endå likare originalen, og deretter laga ei tolking, fortel Marion.

Låta legg seg i pop-sjangeren, og er i same gate som songen «Bare du og eg».

– Me har prøvd å kle den i vårt, så det er ikkje sikkert folk høyre kva låt det er i starten. Men det er noko kjent, så etterkvart rekne eg med folk finn ut av det, seier ho.

Låta har kun dei nærmaste høyrt, og Marion har fått gode tilbakemeldingar.

– Eg har ikkje spelt den live endå, så det er berre dei nærmaste som har høyrt den. Eg har fått mange gode tilbakemeldingar. Nokre meiner at melodispråket er typisk radio, og at låta kan vera enkel å få inn på ulike lister, fastslår ho og legg til:

– Eg gler meg stort til den vert slept. Det er alltid gøy å få ut noko me har jobba lengje med.

Fredag 24. september er låta tilgjengeleg i ei strøymeteneste nær deg.