Marie (22) får Kvinnherad kulturstipend

Anita Lykkja kunngjer kven som blir årets kulturstipendiat i ei pressemelding. Her kan ein mellom anna lesa korleis pengane skal koma til nytte:

Marie Lillesand Høgestøl er den fyrste studenten ved Norges musikkhøgskule som kombinerer utøvarstudium med komposisjon. Ho skal bruke pengane ho får i stipend til å ta private timar hjå songlæraren sin, og til private timar hjå coachen/akkompagnatøren sin, slik at ho kan utvikle den unge stemma si. I tillegg skal ho kjøpe opptaksutstyr og noteskrivingsprogram til komposisjonsstudiet.

22-åringen har vore elev ved Kvinnherad kulturskule i mange år, og då ho skulle til på vidaregåande byrja ho på musikklinja på Stord. Det var der ho fekk interesse for klassisk musikk og moderne kunst.

Stipendet er med å sikra framtida

No held ho fram å utdanna seg ved Norges musikkhøgskule, der ho tek ein fireårig bachelor. Dei to siste åra av denne skal nyttast til song og komposisjon, mykje grunna moglegheitene stipendet opnar for.

– Eg blei først og fremst veldig letta då eg fekk vita at eg får stipendet, for det har så mykje å sei for framtida mi. Eg har lenge vore usikker på korleis eg skulle handtera den komande tida, så eg blei veldig glad då eg fekk beskjeden. Det er ei deilig kjensle, seier Marie.

Timar hos songlærar treng ho for å øve på det tekniske, medan timar hjå coach går meir på det kunstnarlege uttrykket og musikaliteten, forklarar ho.

For å gjera det godt som songar krevst det jamleg arbeid med stemma, og når ho blir uteksaminert frå Norges musikkhøgskule i 2024 ventar ho å kunne ha ein bachelor i både klassisk utøvande song i tillegg til komposisjon.

«Det er berre ein ting som er kulare enn det å vere skikkeleg god på eit instrument, og det er å vere like god på fleire ting som kan kombinerast og ope for eit breiare yrkesliv, samstundes som kvar ferdigheit er med på å utfylle den andre», seier Marie pressemeldinga.

Det å urframføre eigne verk har lenge vore ein stor draum, og no får ho endeleg sjansen.

Satar mot master i klassisk song

I framtida ynskjer ho å ta ein master i song, gjerne i ein av storbyane i Europa.

– Eg har veldig lyst å bli kjend med litt av musikklivet i dei større byane, som til dømes Tyskland eller Austerrike. Der er det større miljø og mange gode moglegheiter, seier ho.

På spørsmål om innbyggjarane i heimkommunen kan gle seg til å høyra musikken hennar i nær framtid svarar den unge songaren følgjande:

– Eg har ingen konkret plan, men det kan godt tenkast at eg kjem heim for å halde konsert, det har eg svært lyst til. Men då treng eg iallfall ein pianist, slår ho fast.

Marie samarbeider med fleire pianistar i utdanninga si, og verkar ikkje ukjend for tanken om å spørje ein av dei om å bli med til Kvinnherad for å halde konsert.

Viser skaparvilje og har store draumar

Under kan ein lesa grunngjevinga til komiteen som har valt å gje kulturstipendet til Marie:

Kulturstipendet vert delt ut ei som er studerar og er utøvar av eit kunstnarisk og kreativt virke. Marie Lillesand Høgestøl søkjer personleg utvikling og kompetanseheving innan faga utøvande klassisk song og komposisjon. Ho vil og få høve til å ta fleire songtimar privat og å kunne kjøpe opptaksutstyr og noteskrivingsprogram. Vi i gruppa som tildeler Kvinnherad kulturstipend meiner søknaden er spennande og søkjaren viser skaparvilje, har store draumar og har vilje til å satse og arbeide hardt for å nå måla sine. Vi gratulerer Marie Lillesand Høgestøl med Kvinnherad kulturstipend for 2022.

Kvinnherad kulturstipend er eit samarbeid mellom Sparebank 1 - SR Bank, Sparebanken Vest, Sunnhordland kraftlag og Kvinnherad kommune.