Mann sikta etter stort narkofunn

– Det er teke beslag i betydeleg mengde narkotika, bland anna amfetamin. Mannen er sikta for ei rekkje lovbrot det siste halve året, mellom anna fleire tilfelle av køyring i rusa tilstand, samt brot på straffelova §232, grov narkotikakriminalitet, opplyser etterforskingsleiar ved Kvinnherad politistasjon Torgeir Fosse i ei pressemelding.

Mannen vart framstilt for varetektsfengsling 13. april, grunna fare for gjentaking. Mannen i 40-åra frå Kvinnherad vart lauslaten av tingretten med dagleg meldeplikt.

– Politiet anka denne avgjerda, men lagmannsretten opprettheldt tingretten si avgjerd, opplyser Fosse.

Gjentatt kontakt

Han ynskjer ikkje å gå i detaljar overfor Grenda.

– Saka blir etterforska vidare av politiet. Av omsyn til etterforskinga ynskjer me ikkje å gå ut med for mykje detaljar.

– Kan du seia kva anna narkotika de har funne?

– Nei, berre at det er fleire ulike typar.

– De har vore borti denne mannen fleire gonger siste tida?

– Ja, og det er me framstilte han for varetekt grunna gjentakingsfare, fordi me ynskjer å stoppa den kriminelle aktiviteten. Retten ville ikkje gje oss det, men meiner meldeplikt meiner dei skal avhjelpa gjentaking av kriminell aktivitet, seier Fosse.

Inntil ti år strafferamme

Mannen er sikta etter §232, som går på grov narkotikakriminalitet, og har ei strafferamme på fengsel inntil 10 år. Stoff, mengde og overtredninga sin karakter spelar inn i vurderinga.

– 150 kg kokain er nok over i det som blir kalla «meget betydelig», og har ei strafferamme på 15 år, kanskje opp til 21 år, svarer Fosse når Grenda be han utdjupa skilnadane i ordlyd.

§231, som omtalar «ordinær» narkotikakriminalitet, har ei strafferamme på opp til to år.

– Det er langt i frå brukardosar til seg sjølv i dette tilfellet, sluttar ein elles ordknapp Fosse.