Mann arrestert etter funn av tjuvgods og narkotika
Ein mann frå Kvinnherad vart i helga varetektsfengsla for fire veker etter at politiet fann store mengder tjuvgods og ulike typar narkotika. Vedkomande har eit langt rulleblad frå før.
Publisert
Sist oppdatert
På dagtid fredag fekk politiet melding om eit køyretøy som ein mistenkte var hensatt på Sunde. Det viste seg at køyretøyet var stole frå ei privatadresse på Sandvoll for kort tid sidan.
– Vi hadde grunnlag for ransaking av ei adresse på Sunde, og fann då fleire gjenstandar som var tjuvgods frå Sandvoll. Det vart også oppdaga fleire andre ting som vi reknar med er tjuvgods. I tillegg fann vi ulike typar narkotiske stoff, fortel politistasjonssjef Sigurd Børve.
Annonse
Politiet fann også den mistenkte gjerningspersonen, og han vart pågripen. Det dreiar seg om ein mann i 40 åra frå Kvinnherad, som politiet, ifølgje Børve, har ei rekke saker på frå tidlegare.
Over 30 saker
– Vi har forsøkt varetektsfengsling på han tidlegare, utan å ha fått tilslag på det. No vart han sett i arresten og transportert til Bergen. Der vart han framstilt for varetektsfengsling på laurdag, og denne gongen fekk vi medhald om fire vekers varetekt, seier Børve, og legg til:
– Vi har registrert over 30 straffbare tilhøve på vedkomande. Det gjeld rus, vinningskriminalitet, narkotika, ruskøyring, køyring utan førarkort og køyring med ikkje-registrerte køyretøy. Vi vil prøva å få han dømt for dette no, slik at vi kan få avslutta sakene, noko som er til det beste for både han og oss.
