Mann (48) tiltalt for drapet på Renate Strand Normann
Ein 48 år gamal mann er tiltalt for drapet på Renate Strand Nordmann på Varaldsøy i april i fjor. Mannen er også tiltalt for vald mot ekssambuaren.
Publisert
Sist oppdatert
22. april i fjor vart Renate Strand Nordmann funnen død på Varaldsøy. Same kveld arrestert politiet ein mann og sikta han for drap.
No har statsadvokat Benedikte Høgseth teke ut tiltale mot mannen. Det melder Bergens Tidende torsdag.
Annonse
Ifølge tiltalen skal mannen ha slått Nordmann gjentekne gongar i hovudet med ein trestokk. Ifølge BA fann etterforskarane ein trestokk med hårstrå frå avdøde og blod frå både ho og den no tiltalte 48-åringen på åstaden.
Ifølge NRK Vestland kan det bli lagt ned påstand om forvaring.
– Dette er ei sak der vi har teke atterhald om forvaring. Det betyr at det er ei sak der vi ser at det kan vera fare for nye alvorlege handlingar og at ein reaksjon med fengsel ikkje er tilstrekkeleg, seier statsadvokat Benedikte Høgseth til NRK.
48-åringen er også tiltalt for mishandling av ein tidlegare sambuar. Ifølge tiltalen skal mannen jamleg ha utsette sin tidlegare sambuar for vald og trugslar i perioden mellom 2014 og 2020.
