Manglar 20 årsverk i ei teneste: – Må vera tøffe

I Formannskapet sitt møte på torsdag fortalde kommunedirektør Leif Ove Mikkelsen om situasjonen i Bu og habilitering. Ifølgje Kvinnherad kommune si nettside er dette ei eining som yter tenester til barn, unge og vaksne med varige og omfattande funksjonsnedsettingar. Tenestene vert gjevne i eigen bustad, i bufellesskap, i avlastningsbustad og som aktivitetstilbod ved dagsenter.

– Vi står ovanfor store utfordringar med rekruttering av personell, og dette har vore eit vedvarande problem, sa Mikkelsen, som la til at desse vanskane gjeld i heile landet. Konkret manglar det helsefagarbeidarar og vernepleiarar.

– Vi har lyst ut fleire gonger utan å få søkjarar. No har vi vakansar på 16% av stillingane, tilsvarande 20 årsverk. Men det blir jobba aktivt med saka. Til dømes kan ei prøveordning med høgare rekrutteringstillegg vera eit verkemiddel, funderte kommunedirektøren.

Førebels supplerer med personell ved å leiga inn folk frå vikarbyrå.

Ikkje god latin

– Det er jo store utfordringar vi snakkar om her, og det er heilt sikkert ikkje noko lett sak. Vi må tenkja utanfor boksen, og kanskje koma opp med radikale tiltak. Det er veldig, veldig mykje dyrare å leiga enn å ha eigne tilsette, kommenterte Ove Lemicka (Frp).

Han undra om eit mellombels tiltak kan vera å flytta på folk frå andre tenester.

– Det er kanskje ikkje god latin å ta dette opp i offentleg samanheng, men i næringslivet kan ein oppleva å bli flytta på, sa han.

Silje Nordtveit Olsen (SV) støtta ikkje tanken om å flytta på personalet.

– Dette er yrkesgrupper som er attraktive i det private næringslivet, og der kan dei få høgare løn, åtvara ho.

Olsen lurte elles på om det er ein idé å høyra med studiesenteret om dei kan få i gang utdanning lokalt for vernepleiarar.

Vera tøffe

Per Harald Havnen Löfgren Johansen (Ap) påpeika at eit rekrutteringstillegg også har sine problematiske sider.

– Vi har dei som allereie er tilsett utan å få tilgang til dette. Men rekrutteringstillegg er truleg betydeleg betre økonomisk for oss enn å bruka vikarbyrå, analyserte han.

Jostein Rødland (INP) la fram eit ambisiøst forslag.

– Eg trur vi skal vera så tøffe at vi neste år kuttar 10-15 millionar kroner på vikarbyrå, og så aukar vi heller grunnbemanninga og byrjar å tilsetja folk. Eg trur vi då også får ned sjukefråværet, og oppnår dermed ein dobbel effekt, argumenterte han.

Saka var ikkje oppe til votering, berre til informasjon.