Mange ville tett på naturen
Søndag ettermiddag inviterte Halsnøy kloster til årets første arrangement. På programmet sto to naturfotografar frå Valen, Atle Hellan og Sigve Solheim.
Publisert
Før foredraget helsa Helén Petersen velkommen, og kunne blidt melda at alle som var kome hadde fått plass. Og det var mange. Både den grøne og den raude stova var fulle av skode- og lyttelystne menneske.
Då fotografane overtok ordet byrja Sigve Solheim med å fortelje at denne utstillinga hadde dei gledd seg til.
Annonse
– Me har kvidd oss litt òg, skaut Helland inn frå sidelinja, til god lott i stova.
Slik heldt Atle og Sigve fram i det om lag 45 minuttar lange foredraget, der dei fortalte om kor mykje planlegging det ligg bak å få festa slike imponerande nærbilete av det ville dyrelivet på minnebrikkene. Her fekk ein kome tett på alt frå ørner og hjortar, til skogmus, småfuglar og augestikkarar.
I tillegg til planlegging, handla det om å vera på rett stad til rett tid, fortalte dei, og beviste gjennom fotografia sine at desse karane ofte har vore på rett stad til rett tid.
Publikumsleik
Annonse
Medan Sigve fortalte om orrleiken, som både han og Atle veit kor dei skal gå for å fotografera, påpeika han kor greitt det var å planlegga.
– Det er ikkje alltid berre å gå ut og få seg eit nummer, sa han, medan eit par orrfuglar para på skjermen bak han. Og gjestene humra godt, igjen.
Etterkvart som bileta og små filmsnuttar rulla over lerretet, responderte publikum med godlydar.
– Fabelaktig! Oj! Wow! Fantastisk! Guri, kor flott! Nei, sjå der! Åh! draup det leikande frå dei med jamne mellomrom. Og dét både under foredraget, samt etterpå når publikum vandra gjennom utstillinga.
Bileta til dei lokale naturfotografane pryda veggane både i den raude stova og i galleriet nede i kjellaren. Utstillinga, «Tett på naturen», heng til 1. april, og dei som ikkje fekk den med seg under opninga, kan gle seg over at Halsnøy kloster har ope laurdag og søndag i helgene framover.
