Mange vil ta bilete av denne idyllen – no åtvarar SKL dei besøkjande mot å bada i vatnet

I løpet av nyttårshelga vil Grenda leggja ut fleire av dei mest leste sakene frå året som har gått.

Idylliske bilete frå eit turkisgrønt Fjellhaugvatn har gått sin sigersgang i sosiale medium denne sommaren. Fleire reise-influensarar deler bilete frå den iaugefallande tropiske fossen, og fortel til sine følgjarar at dei berre må ta turen til Fjellhaugvatn for å få med seg denne perla. Og så langt ser det ut som at følgjarane lyer.

Trafikken er stor, og dårlege parkeringstilhøve har til tider skapt smått kaotiske tilstandar oppe ved vatnet. Sjølv om SKL synest det er hyggeleg at folk tek turen, går dei no ut og åtvarar dei besøkjande mot å bada i vatnet.

– Me ser at det er stor trafikk i området rundt Fjellhaugvatn og Blåfalli III kraftstasjon. Det er hyggeleg at folk vil oppleva den flotte naturen i området, men ver varsam med bading i det iskalde vatnet, og særskild rundt utlaupet frå kraftstasjonen, skriv SKL i ei melding på Facebook.

Stor merksemd

Instagrammar Helene Myhre er ei av mange som har tipsa sine følgjarar om vatnet ved Bjørnebøle. Etter at ho delte bilete av Fjellhaugvatnet med sine 136.000 følgjarar på Instagram, tok det av i kommentarfeltet.

– Eg har aldri fått så mange spørsmål om ein stad som då eg delte bilete av denne plassen på story. Det skjønner eg godt, for dette ser ut som eit tropisk paradis på ein fin sommardag, skriv Helene Myhre under eit bilete av Fjellhaugvatn på Instagram.

Men merksemda vart litt større enn ho hadde tenkt. Dermed la Myhre nokre dagar seinare til ei oppdatering under posten.

– Eg vil oppmoda til å visa omsyn om du vel å reisa på besøk. Vatnet er ein del av eit kraftverk og det vert stadig regulert. Det er også dårleg med parkering her, skriv ho på Instagram.