Mange søknader og høg ja-prosent: – Ser lyst på framtida

På eit møte i januar i år bestemte eit fleirtal av folkehøgskulerektorane at opptaksdatoen til folkehøgskulane skulle endrast. Det løypande opptaket vart flytta frå 1. februar til 15. november. I år er det fyrste gong i historia at Sunnhordland folkehøgskule på Halsnøy har kunne ta inn elevar så tidleg.

– Det har dermed knytt seg stor spaning til om ungdomen der ute er klar for å senda søknad for det neste skuleåret så tidleg. Det er difor ekstra gledeleg at per i dag så har vi ikkje berre fått rekordmange tidlege søknadar, men har også ein ja-svarprosent som overgår dei førre åra med god margin, seier ein stolt rektor Bente Sjo i ei pressemelding.

Fylla seg opp

Så langt har 61% av søkjarane takka ja til studieplass ved Sunnhordland folkehøgskule. Dei tre linjene som er mest populære er allereie i ferd med å fylla seg opp.

– Vi ser lyst på framtida og nyttar høvet til å koma med følgjande oppfordring: Vurder eitt år på folkehøgskule. Det er ein skule med høgt fagfokus, og den er karakter- og eksamensfri. Finn di linje og søk i dag, seier Bente Sjo.