Kristin Oudmayer, direktør for barns rettar og berekraft i UNICEF, meiner deira siste juleunderøking viser at julehøgtida bidreg til eit forsterka klasseskilje.

Mange gruar seg til jul

I slutten av november publiserte UNICEF Norge funna frå deira årlege juleundersøking. Denne viste at rundt 400.000 nordmenn gruar seg til jula.

Jorun Larsen
Publisert

Særleg representert blant dei som gruar seg er gruppa med lågast husstandsinntekt, altså under 300.000 kroner. Jula bidreg i følgje Kristin Oudmayer, direktør for barns rettar og berekraft i UNICEF Norge, til forsterka klasseskilje.

Undersøkinga viser mellom anna at det blant husstandar med heimebuande born er 11% som i liten grad føler at dei evnar å gi borna den julefeiringa dei fortener. I 2019 var dette talet på 7%, og trenden er såleis stigande.

– Medan kvar fjerde nordmann svarar at førjulstida og jula forsterkar kjensla av dårleg økonomi, er det nesten seks av ti i gruppa med lågast økonomi som opplever dette. To av fem med lågast inntekt føler det er vanskeleg å tilfredsstille alle familiemedlemmane sine forventningar og behov, skriv UNICEF Norge i ei pressemelding.

Vidare kan ein lesa at 65% av dei spurte svarte at dei sannsynlegvis ville teke i mot hjelp frå andre for å gi eigne born fleire positive opplevingar i jula.

Barnefattigdom i Kvinnherad

Dei siste tala som er offentleggjort for barnefattigdom i Norge er frå 2019. Desse viste at 11,7 % av alle born i Norge vaks opp i ein familie med vedvarande lavinntekt det året. Auken frå 2018 var på meir enn 4000 born.

I 2019 vaks 9,9% av borna i Kvinnherad opp i ein familie med vedvarande lavinntekt. I følgje Bufdir sine tal gjaldt dette 248 born. Sjølv om tala for 2020 ikkje vil bli offentleggjort før våren 2022, ligg det føre nasjonale rapportar som indikerer at pandemien har ført til at personar som frå før hadde låg inntekt, samt barnefamiliar, har blitt ekstra hardt råka av permitteringar og oppseiingar dei siste to åra.

UNICEF sine tips og råd

– Inkluder nokon du veit er einsame eller har det vanskeleg. Ta ein telefon, gå ein tur eller inviter på førjuls-hygge – med smitteomsyn.

– Møt menneske i nærmiljøet med openheit og rausheit. Å slå av ein prat eller tilby hjelp eller samvere kan bety mykje for mange.

– Hugs at det er dei vaksne som legg lista for kva som skal bli familien sin gåvetradisjon.

– Be borna lage ønskeliste med realistiske rammer, og snakk med dei om korleis dei fortel andre i klassen om hyggelege opplevingar og kva verdiar og tradisjonar familien har.

– Få borna med på å lage og førebu ting som kan gleda og inkludera andre.

sosiale tilhøve økonomi norge kvinnherad høgtider fritid familie og born nyhende
Powered by Labrador CMS