Mange er interesserte i sopp

Statistikk frå SSB visar at talet menneskjer som drar på bær- og sopptur har auka markant etter pandemien. Tal frå 2020 visar at 29% var på bær- eller sopptur, medan tala frå året etter visar 42%.

Det er altså mange fleire som nyttar naturen til hausting enn før. Laurdag kunne ein koma med sjølvplukka sopp og få dei sjekka og identifisert av soppsakkyndige Geir Flatabø frå Norges sopp- og nyttevekstforbund.

Om lag 20 stykke møtte opp til soppkontrollen, og det var etter kvart mange artige artar spreidd utover bordet. Ingrid Andrea Miljeteig hadde plukka ein av Noregs giftigaste soppar berre for at den skulle bli vist fram.

– Det er lika viktig å læra seg dei giftige soppane. Då veit ein kva ein skal styra unna, seier Miljeteig.

Den dødeleg giftige «spiss giftslørsoppen» står ofte ilag med kantarellar, og om ein ikkje er obs kan den lett verta med i soppkorga.

– Ein liten mengde på storleik med ein sukkerbit kan vera dødeleg, og det er derfor særs viktig å vere obs på dette. Det er mange som plukkar kantarellar, og om dei kjem på soppkontroll og vi finn ein spiss giftslørsopp er vi nøydd til å kasta heile korga, fortalde Flatabø.

Det var også mange spiselege soppar som vart kontrollerte, som til dømes lakssopp, griseøyre eller krittøstersopp, traktkantarellar, piggsopp, fleire typar kremler og svart trompetsopp.

Livslangt medlemsskap

Geir Flatabø har plukka sopp i mange år, sidan han som seksåring plukka både kantarellar og piggsopp ilag med kompisen Jo. Han har ein enorm interesse og kunnskap om forskjellige soppar.

Har interessa berre utvikla seg sidan?

– Ja utvikla seg kan du seie, men den har i alle fall ikkje stoppa, ler han, og legg til;

– Eg har vore livsvarig medlem i sopp- og nyttevekstforbundet sidan 15års-alderen, og eg kjem ikkje til å stoppa det heller.

Etter soppkontrollen var det duka for føredrag om norske matsoppar, og Geir gav dei 15 frammøtte ei god og lærerik innføring.

Gjerne igjen

Sara Nonås Langhelle, som er leiar for natur på Folgefonnsenteret fortel at dei har snakka ei stund om å arrangera soppkontroll.

-Det er mange som er interesserte, men og mange som aldri har plukka før og kanskje er litt usikre, så då er soppkontroll ein fin ting å dra på for å dobbeltsjekka kva ein har plukka, seier ho, og legg til;

-Sussi Bodin på turistinformasjonen har vore ein pådrivar på å få dette til. Ho er eit unikum som kan masse om alt, og i tillegg ein kjempeivrig sopplukkar!

Sara fortel vidare at det å få inn ein soppsakkyndig til å føra soppkontrollen skapar ein trygg arena for nybyrjarar som vil ut og plukka sopp. At det blir fleire gonger er ikkje å sjå vekk ifrå, og kanskje ein snart kan koma på nyttevekstkurs også.