Malin og Frøy oppdaga brannen
To vakne niandeklassingar oppdaga og meldte frå om brannen i terminalbygget, og sytte for at sløkkinga kunne koma raskt i gang.
Publisert
– Me var på kaien og skulle laga musikkvideo til norsken. Me ville inn på venterommet for å sjå på telefonane kva me hadde fått filma, men då me opna døra kom det svart røyk veltande ut. Me såg ingen ting inn i rommet, for alt var heilt svart, fortel Malin Hellingsrud Fosse og Frøy Sæle, som begge går i 9B ved Rosendal ungdomskule.
Dei såg ingen flammar inne i den svarte røyken, men sprang resolutt dei få metrane bort på Folgefonnsenteret og sa i frå i resepsjonen der.
Annonse
Der slo Margit Lund-Mikkelson alarm, og brannvesenet og politiet kom raskt til staden, og fekk sløkt brannen før det utvikla seg meir.
Fyrverkeri mogeleg årsak
– Me har funne noko som kan sjå ut som restar av fyrverkeri. Det kan vera nokon som har vore uforsiktige med den slags inne i venterommet, utan at eg skal konkludera heilt på det, seier Sigurd Børve ved politiet i Kvinnherad etter at politipatruljen har trekt seg ut av terminalbygget.
– Me er interesserte i å koma i kontakt med folk som har vore i området før og rundt tidsrommet meldinga kom inn til oss, som var kl. 13.11 onsdag, legg han til.
Annonse
Det hadde også svidd oppover bjelkekonstruksjonen inne i venterommet.
– Hadde ikkje brannvesenet vore så raske på plassen, så kunne dette gått langt verre, sluttar Børve.
