– Målet er ei kyrkje i året

– Me har eit tolvårsintervall på dette her, og har som mål om éi kyrkja i året, fortel arbeidsleiar for utesekjon Alf Jarle Langeland.

– Kva tid me blir ferdige er vanskeleg å seia, mai er ein frykteleg travel månad for oss med heilagdagar, inneklemde dagar, konfirmasjonar og andre ting. Målet er å bli ferdig til me går ut i ferie om tre veker. Det både håpar og trur me at me skal klara, forsikra Langeland.

Til saman er dei fem kyrkjetenarar og kyrkjegardsarbeidarar som syt for at jobben vert gjort.

– Me trør til alle mann som kan, men me er aldri alle saman samtidig. Det er alltid nokon som har andre gjeremål, men på fredag skal til og med kyrkjeverjene vera med og måla, sa ein nøgd Langeland.

Vaska vekk

Til hausten, nærare bestemt 1. september, feirar Eid kyrkje heile 200 år, men at det heng saman med målinga no avkreftar Langeland.

– Det er kjekt å ha ting på stell til jubileet, men det er litt tilfeldig. Me tek dei som står for tur ut i frå behovet. Til neste år blir det anten Holmedal eller Åkra. Me får ta ei vurdering til hausten og bestemma kva som blir gjort, understreka han.

– Kor lang tid vil det ta og kor mange liter måling går det om lag med til ei slik kyrkje?

– Til denne kyrkja kjøpte me inn tolv 120-liter spann. I fjor så tilsette me ein person til på heiltid, då med vilkår om at me skulle stå for målinga sjølve éi gong i året, og då sparar me inn det det ville ha kosta å leiga inn med god margin. I fjor måla me Husnes kyrkje, og det tok oss om lag 400 timar, forklarte Langeland.

Langeland skuldar på ein travel mai-månad for at dei ikkje kom i gong før finvêret tok slutt.

– Det var jo fint kjempelenge, og då måla me ikkje. Så kom regnet og då målar me litt. Det er som sagt mai som er travel, men no er fyrste strøket på på lesida. Han eine karen som var med prøvde å måla på framsida, men då var det tydeleg at det hadde blitt vaska vekk etterpå. Men dette skal gå fint, konkluderer han noko sikker.