– Målet er at alle skal ha det kjekt

Alle som éin valde dei rett veke å ha leir på med strålande fint vêr og høge temperaturar. På fotballskulen sin siste dag tok underteikna ein tur innom for å lodda stemninga. Og fleire smilande fjes samla på ein stad måtte ein ha leita lenge etter.

På det som også var sommarens hittil varmaste dag gjorde deltakarane ein formidabel jobb på dei ulike stasjonane. Sjølv om det nok var den tradisjonsrike vasskrigen som var høgdepunktet denne dagen, var det før lønsj framleis fotball som stod på agendaen. Fotballskuleansvarleg og fotballeldsjel Kurt Dahl var strålande nøgd med veka.

– Alt har gått veldig fint, mykje takka vera ungdomane me har fått med oss som trenarar. Me er heilt avhengig av å ha dei med oss, og dei har vore både flinke og kjekke å ha med. Målet er at alle skal ha det kjekt. Jo, det er fotballtrening, men fyrst og fremst skal det vera gøy, fortalde Dahl.

Nye erfaringar

Men det hadde ikkje vore heilt enkelt å skaffa nok trenarar.

– Eg har strevd litt med å få tak i nok vaksne, ja. Eg har jobba for det, for å seia det slik. Men eg kom i mål, så det var jo kjempefint, sa Dahl.

– I tillegg har me no blitt fleire nye i fotballstyret som ikkje har vore med på dette før, så me har fått ein del nye erfaringar. Men me har også gått god hjelp av dei som var før oss. Me var litt spente på om me hadde hugsa alt, men det har gått veldig fint. Det har gått som smurt, fortsette han.

Dahl takkar også vêret for å spela ei stor rolle i suksessen.

– Det hjelper jo veldig med det fine vêret, og me har hatt nokre gode sommardagar. Ruskevêret ser ut til å koma rett etterpå. Høgdepunktet plar alltid vera vasskrigen heilt til slutt, før me avsluttar med utdeling av diplom og is. Og ikkje minst eit bilete av heile gjengen, understreka han.

– Gleda ved det heile er å sjå at dei har det gøy, og at dei blir gira. Etter kvart kjem også konkurranseinstinktet fram, la han til smilande.

Gøy å læra vekk

At dei unge fotballspelarane hadde det gøy var ikkje vanskeleg å sjå, noko dei sjølve også kunne bekrefte.

– Det har vore veldig bra, konkluderte ei gruppe jenter som haldt på med å øva på å skyta på mål.

– Det er om å gjera å skyta ballen i mål, dersom ein får to mål er ein fri, dersom ein får null mål er ein ute. Men det er kjekt uansett, sjølv om det er kokvarmt, forklarte dei.

Også trenarane storkoste seg med både fotballtreninga og borna i varmen. Mari Hjelmeland og Tilde Leganger var heilt klare på kvifor dei valde å bli med som trenarar.

– Eg hugsar at eg sjølv tykte det var veldig kjekt å vera med når det var eldre ungdomar som var trenarane, sa Hjelmeland.

– Ja, det var gøy når dei eldre var med. Det er også veldig gøy å læra vekk det ein kan til dei som er yngre, og vera med dei. Det er veldig sosialt, la Leganger til før dei på ny blei slukt av oppgåvene sine.