– Målet er å spreia juleglede og julehåp til alle

Måndag og tysdag i neste veke skipar barnekora frå Rosendal saman med barnekor frå både Uskedalen og Husnes til julekonsertar for brukarane på både Husnes- og Rosendalstunet, men også for alle andre som måtte ynskje å koma.

– Me vil ha konsertane på desse to tuna fordi mange som bur der ikkje får gått på vanlege julekonsertar som er på kulturhus og kyrkjer i kommunen vår. Me håpar at både vener og familie av dei som bur der finn vegen til julekonsertane desse ettermiddagane, i tillegg hadde det vore veldig kjekt om det kjem mange utanfrå institusjonane også, fortel musikalsk leiar for Rosendal Barnekor og Rosendal Tweens Solfrid Siqveland i ei pressemelding.

– Me får med oss proffe musikarar som Christian Meaas Svendsen på kontrabass og Rebekka Attramadal på piano. I tillegg vil Singing Tweens sin pianist Reidar Algerøy bli med på nokre av songane, legg ho til.

Konsertane er eit flott samarbeid mellom Anita Lykkja og Kristian Helgesen i kommunen, samt at dei har fått midlar frå den kulturelle spaserstokken.

– Midlar frå den kulturelle spaserstokken er heilt essensielle for å klara dette. Då kan også arrangementa vera gratis for alle som ynskjer å koma, seier Siqveland i pressmeldinga.