Malene og Yann fekk nærkontakt med spekkhoggarar
Ein flokk på mellom sju og ti spekkhoggarar har kosa seg i Hardangerfjorden dei siste dagane. Søndag fekk Malene og Yann orkesterplass til eit show utan like.
Publisert
Sist oppdatert
Dei vart observerte utanfor Uskedalen på laurdag, og søndag formiddag nytta spekkhoggarane til eit safari lenger inne i fjorden. Det fekk også fleire nyfikne til å nytta høvet til eit lite kvalsafari i nabolaget.
I Rosendal spreidde ordet om spekkhoggarar i fjorden i løpet av formiddagen.
Annonse
Nærkontakt
– Me skulle ned å fiksa noko på ein annan båt me har, men fekk melding av mamma om at det var spekkhoggarar ute. Me hoppa i denne skjergardsjeepen og køyrde etter dei, fortel Malene Dekke Eik og turen ho og Yann Robiou du Pont tok ut på.
Dei la ut i frå båthamna i Rosendal, og fekk auge på spekkhoggarane nesten ute ved Snilstveitøy.
– Me høyrde dei faktisk før me såg dei. I byrjinga heldt me god avstand, og la oss litt framfor og på sida av der dei var. Kvalane dukka under båten, og var nyfikne på oss. Dei oppsøkte oss sjølv om me køyrde båten på sakte fart føre dei. Me kom veldig nær. Me observerte oppførselen deira før me nærma oss dei. Dei var så rolege i framferda at eg ikkje var redd for å vera i ein liten båt ved sida av dei, forklarer Malene.
Annonse
Nyfikne
Dei følgde spekkhoggarane mot Årsnes, og fekk talt opp til kring ti dyr.
– Det var ein som var veldig stor som heldt seg litt på avstand. Dei var mellom sju og ni, og i alle fall to ungar, kanskje tre. Dei heldt seg i to grupper, og gruppene var ikkje oppe og blæs samtidig. Dei heldt god avstand frå kvarandre, gjer Malene greie for.
Ho tykkjer det var ei spennande oppleving, og første gongen ho har sett det her i fjorden, trass i at Malene er mykje på sjøen.
– Eg trur nok dei jagar etter stimar med fisk, men det verka ikkje så dei jakta då me var nær dei. Denne flokken tok det veldig roleg og var veldig nysgjerrige, seier ho om flokken.
