Målblomen 2024 til Merethe Offerdal Tveit

– Du er ein del av eit mindretal med høve til å utforska rom og stadar andre ikkje har tilgang til. Det er noko eksklusivt som rår over målforma. Likevel kan det krevja ryggrad å halda på nynorsk, sa Kristian Bringedal i Kvinnherad mållaget i samband med overrekkinga av prisen.

– Dette er ei stor ære! Det er naturleg å bruka nynorsk i Offerdal Film. Eg tenkjer ikkje over det til dagleg, men då eg skulle formulsera noko om mitt forhold til nynorsk, så såg eg at det er ein kjærleik til nynorsken, sa Offerdal til årsmøtet då ho mottok heideren og målblomen.

Annleis

– I ein del samanhengar kjenner ein på det å vera annleis. I filmmiljøet i Noreg dominerer bokmålet. Det er oftast slik at alle dei andre ho samarbeider med, brukar bokmål. Då er det opp til henne å velja kor mykje ho vil arbeida for at sluttproduktet blir på nynorsk, sa Bringedal vidare.

Som regissør, og på mange måtar er ansvarleg for det kunstnarlege og innhaldsmessige i prosjektet, får ho lov å bestemma.

– I fleire av filmane, særleg dei kortare og meir kunstnarlege, er nynorsk svært viktig. Eg skriv gjerne eit dikt eller ein tekst som eg les inn og som går gjennom heile filmen. Mange av filmane mine er svært personlege og eg er glad i arbeidet med tekst. Eg er i det heile veldig glad i å arbeida med nynorsk. Det er ein stad eg kjenner meg heime, seier Offerdal Tveit sjølv om det som er den føretrekte språkforma hennar.

Dette seier mållaget sjølv om målblomen:

Kvinnherad Mållag vil arbeida for eit godt og tenleg forretningsmål på nynorsk. Dette kan mellom anna gjerast ved å hjelpa og stimulera verksemder og organisasjonar til å bruka nynorsk i lysingar, marknadsføring og elles i alt skriftleg tilfang internt og mot kundar og brukarar. Målblomen er ein «pris» for medvite bruk av nynorsk i kommunal og offentleg teneste, private verksemder og organisasjonar. Kvinnherad mållag har sidan 1999 tildelt Målblomen til verksemder i kommunen som over tid har synt positiv vilje og evne til å bruka målforma nynorsk.