Magnus fekk ein kongedag
– Det var veldig kjekt å vera med på, seier Magnus Gjøtterud Henriksen om dagen som kong Magnus Lagabøter.
Publisert
Tysdag vart landslova til kong Magnus Lagabøter feira til fulle i Bergen, i regi av Vestland fylkeskommune. Ringside var Magnus Magnus Gjøtterud Henriksen (18) frå Valen, som var trekt ut til å vera kong Magnus Lagabøter denne spesielle dagen.
– Dette var veldig kjekt å vera med på, seier Magnus til Grenda.
Annonse
Kjendis
Heile tysdagen gjekk til jubileet, og Magnus vart mellom anna intervjua av NRK direkte i Dagsrevyen om dagen.
– Det kom litt brått på, men var gøy, det også, humrar han gjennom telefonen onsdag formiddag, medan han ventar på snøggbåten heim til Kvinnherad.
– Eg følte meg litt kongeleg, med trykk på litt. Eg var mest som ein tilskodar, og det var kjekt å sitja på første rad og få med seg det som føregjekk. Eg har ikkje vore så interessert i historie i utgangspunktet, men er blitt meir no etter dette, det har opna augo mine litt. Teater har eg lyst å få med meg meir av, eg likte teaterframsyningane, seier ungdommen.
Annonse
Dagen handla i stor grad om korleis livet var i middelalderen, og kva som prega lovene.
– Ingeborg kunne meir om dette, ho hadde nettopp levert inn master om temaet og Magnus Lagabøter. Det var fleire ordførarar, og kulturministeren heldt tale, oppsummerer Magnus.
Då Grenda snakka med han før pinsa, kunne han avsløra at foreldra ikkje visste at han var trekt ut.
– Kva sa foreldra dine då dei las om deg?
– Dei blei overraska, men syns det var gøy at eg fekk med meg denne dagen. Eg heldt det hemmeleg for dei ei vekes tid. Det var jo litt tilfeldig at eg blei med på det, men veldig kjekt, seier guten som no har fått ein ørliten smak av livet som kjendis.
