Magnus (18) blir konge for ein dag

– Me har etterlyst ein Magnus og ein Ingeborg i rette alderen, og han tok kontakt med oss, fortel kommunikasjonssjef i Hordaland fylkeskommune Hilde Jordanger Mæland til Grenda.

Magnus Gjøtterud Henriksen sjølv hadde eigentleg gløymt at han hadde søkt om å få vera konge for ein dag.

– Det stod på alle storskjermane på skulen tidlegare, «Er du Magnus over 18, så kan du vera med på ein fest?» Kvifor ikkje, tenkte eg og maila dei, skreiv at eg ville vera med, og gløymte det heilt ut. Og så kom det mail etter nokre veker, seier valebuen.

Heilt konge

Han skal saman med Ingeborg (23) frå Bergen få vera med på utstillingsopninga i Håkonshallen på tysdag, der Bergen kommune. Då blir han konge for ein dag.

– Eg anar ikkje korleis det blir, og har ikkje gjort meg store tankar om det. Eg gler meg, sjølv om eg ikkje veit heilt kva som skal skje. Og eg har ikkje fortalt det til mamma og pappa enno, smiler han.

18-åringen går på tip i førsteklasse på Kvinnherad vidaregåande skule, og påstår han eigentleg ikkje så historieinteressert, men han stiller i finstas i Håkonshallen med eit ope sinn.

– Eg tar med ein kompis i frå Bergen som var gira på å vera med, seier han.

Landslova vart laga i Håkonshallen i Bergen i 1274, for 750 år sidan.

– Me satsar på at det blir lærerikt og hyggjeleg å få vera med på, og me håper det blir ein flott dag for han. Det er få som er kjent med landslova og betydninga av den, også for den eksisterande norske lova. Det må kanskje eit jubileum til for å få løfta det fram og setja det i rette konteksten. Utstillinga er med på å gje ei forståing av dette, sluttar Mæland.