– Må tenka på andre enn oss sjølve

Aslaug Hellesøy ønskte velkommen til møtet, og innleia med å vise til Ulstein sitt internasjonale arbeid for solidaritet og rettferd. I pressemeldinga vart det slått fast at pandemien hadde forsterka forskjellane mellom fattige og rike i verda, ein problematikk som også fekk mykje merksemd når ungdommane sette i gong med spørsmåla dei hadde førebudd. Sjølv om ungdommane hadde lokale og nasjonale saker på agendaen, var det Ulstein sitt internasjonale engasjement som fekk størst fokus.

Tilbakeslag etter pandemien

Den første kohorten som fekk stilla spørsmål til Ulstein var elevar frå KVV. «Trur du vi kjem til å nå berekraftsmåla?» var noko av det første dei lurte på. Ulstein viste til korleis arbeidet med å nedkjempa fattigdom, legge til rette for utdanning, straum og reint vatn, med meir, hadde gått i riktig retning fram til pandemien braut ut.

– Men i løpet av dei siste 8-10 månadane har vi sett eit stort tilbakesteg i arbeidet. Eg trur difor det blir steinvanskeleg å nå berekraftsmåla innan 2030. Dei som har forska på dette reknar til dømes med at rundt 13 millionar fleire jenter har blitt gifta bort på grunn av pandemien, informerte han eit lydhøyrt publikum.

Fattigdom i Noreg

«Kvifor hjelper vi ikkje fattige i Noreg meir?» var det neste utviklingsministeren måtte svara på.

– Det er ein viktig verdi å bry seg om andre enn seg sjølv, men ein treng ikkje setja desse opp mot kvarandre. Vi skal gjere begge deler, slo han fast.

Ulstein gjorde det likevel klart kor hans politiske engasjement var sterkast. Ei av hendingane som hadde gjort sterkast inntrykk på han var då eit skip forliste utanføre Lampedusa i 2013, kor rundt 350 menneske mista livet. Ulstein arbeidde då med flyktningar frå kontoret sitt i Bergen, og vart oppringt av ei kvinne som fortalte at guten hennar var om bord på dette skipet. Guten hennar overlevde, men så heldig var ikkje søskenbarnet hans.

Sjølv om dette var meir ein respons om flyktningproblematikk enn eit svar på spørsmålet om fattigdom i Noreg, gjekk presentasjonen vidare til å handle om likestilling.

Utviklingsministeren viste til korleis dette heng saman med tilgang til utdanning, og at forskjellane stadig vert reprodusert av at det er dei som har utdanning som også får moglegheiter innan arbeid. Han hadde sjølv sett korleis jenter hadde blitt redda frå seksualindustri, frå organindustri og frå slaveri, noko som såg ut til å gjera inntrykk på elevane.

Vaksinefordelinga vart også tema, eit arbeid Ulstein har vore svært delaktig i på internasjonalt nivå. Han hevda at Noreg var eit føregangsland, både med tanke på finansiering og fordeling av kjøpte vaksinar. Som tidlegare freista han å gå i dialog med ungdommane, ved å spørje dei kva dei tykte om vaksinefordelinga. Som eit tankekors peika han på korleis dei norske ungdommane no skal vaksinerast, medan mange sjukepleiarar og menneske i fattige land framleis ikkje har tilgang på vaksine.

Cecilie Karin Alver Sjo og Ina Hillestad frå KVV tykte det var eit interessant å lytta til det Ulstein hadde å fortelja.

– Vi har sett oss inn i berekraftsmåla i samfunnsfagtimane på skulen, der vi også vart samde om kva vi ville spørja om. Han svarte veldig grundig. Eigentleg fekk vi svar på meir enn det vi lurte på, slo dei fast då seansen for deira kohort var over.

Pengar til eldreomsorg og pårørande

Elisabet Svalland fekk dernest ein kort audiens med Ulstein, kor ho undra kva Krf ville gjera for eldreomsorg, omsorgsstønad til pårørande og for å leggje til rette for å få på plass nok helsefagarbeidarar og sjukepleiarar. Svalland fekk stort gehør for at dette var viktige satsingsområde. «Vil KrF øyremerke meir pengar til eldreomsorg?» ønskte ho å vita.

– Helsearbeidarar er kjempeviktige, og det er mange som har stått på, særleg no den siste tida. Det er viktig å få riktig ordlyd på svaret, meldte Ulstein og gav eit nikk til sin personlege assistent Sondre Olsen.

Nokre minuttar etter tikka det inn ein sms der det vart påpeikt at KrF skal jobba med å «gjennomføre ein økonomisk forpliktande opptrappingsplan for bemanning i eldreomsorga, og utvikle ein rettleiande minstenorm for bemanning og kompetanse i sjukeheimar og heimetenester basert på helse- og omsorgsbehov.»

«Glade i skulen vår»

Siste kohort var elevar frå 8.trinn ved Øyatun ungdomsskule. Spørsmåla reflekterte kva elevane var opptekne av. Dei undra mellom anna kvifor Ulstein ville bli politikar, om KrF ville jobbe for å tillate 16 åringar å ta billappen, og var aktivt med på dialogen. Også desse elevane spurte kva Krf ville gjera med barnefattigdom i eige land, og viste mellom anna til korleis enkelte droppar å gå i bursdagsselskap fordi dei ikkje har pengar til å kjøpe gåve.

Ulstein viste då til barnetrygda, som KrF har arbeidd med å auka, noko han hevda hadde svært stor betydning for mange familiar. Han ønskte også å legge til rette for at fleire fritidsaktivitetar skulle bli gratis. Men igjen viste han til at det finst mange som har større utfordringar innan fattigdom enn i Noreg.

– Men kanskje er det enno vanskelegare å vera fattig i eit så rikt land? funderte han.

Elevane ved Øyatun ville også vite om det var noko KrF kunne gjera for at dei skulle få behalda skulen sin. Dei vart møtt med forståing for at det var ein vanskeleg situasjon å stå i, var det lite han kunne bidra med.

Avslutningsvis stilte Elisabet Brakestad Boge (16) frå Rosendal nokre spørsmål. Som Kvinnherad sin yngste KrF-politikar meinte ho det var viktig å følgje med på politikken som Hordaland sine kandidatar fører.

Aslaug Hellesøy rosa avslutningsvis ungdommane som hadde arbeidd med spørsmål til Dag Inge Ulstein.