– Må sjå kva som skjer
Sjølvbeteningskassar har blitt eit vanleg syn på stadig fleire matbutikkar, men går ein til dømes inn på Rema 1000-butikken på Husnes vil ein ikkje finna eit slikt system.
Kjøpmann ved ovannemnde butikk Dagfinn Gjerde kan fortelje om framtidsplanar som kanskje blir sett på vent.
Skeptisk
Annonse
– Planen er at me også skal få sjølvbeteningskassar, men sist eg sjekka så var me langt nede på lista og blir ikkje prioritert akkurat no. Men eg har jo sett oppslaga i avisene i det siste, i tillegg til at ein høyrer jo om ein del erfaringar frå kollegaer også, og må sei at eg er litt skeptisk til kor godt det fungerer, fortalde Gjerde.
– Eg tenkjer at dette kanskje er noko som må vidareutviklast, det trengs eit betre system slik at folk faktisk betalar for det dei kjøper. Me har jo små marginar i daglegvarebransjen, og kan ikkje leva med eit svinn opp mot 2000 kroner om dagen slik som andre melder om. Då snakkar me om alvorlege summar, fortset han.
Ei anna side av saka han trekk fram handlar om kundeopplevingane.
– Det handlar også litt om kva type kundar me har. Her hjå oss handlar folk store korger, og når ein har mykje varer så eignar slike sjølvbetjeningskassar seg dårleg. I tillegg så er det mange av kundane som set pris på å slå av ein prat i kassa eller å få litt ekstra hjelp. Det er også mange kollegaer som har fått høyra; «jobbar det ikkje folk her?», sa Gjerde.
Annonse
– No er det rett nok ikkje berre opp til meg, me må sjå kva Rema 1000 sentralt seier. Så får me også sjå kva som skjer no når andre butikkar tek sjølvbeteningssystemet ut att. Men sjølv om me skulle få slike kassar, så vil det ikkje vera på kostnad av dei tilsette. Me skal fortsetje å ha i alle fall tre bemanna kassar. Men det er klart at sjølvbetente kassar også kan vera praktisk for dei kundane som berre er innom for nokre få ting, legg han til avslutningsvis.
